UMcCleod uchazwe njengeqhawe
UYEDWA unompempe obekwaziwa ukuthi uzodlalisa umdlalo wezinkunzi zaseSoweto, i-Orlando Pirates neKaizer Chiefs. Lowo kwakuwu-Ian McCleod.
Lo nompempe wayehamba nawo umnyakazo webhola, egijima kangangoba uma esekhiphe isinqumo, akekho umdlali owayecabanga ukusiphikisa isinqumo sakhe.
UMcCleod owazakhela ugazi kubalandeli ubengacucuzi ngokuhlaba umdlali ngekhadi elibomvu.
Ukudlula kwakhe emhlabeni ngeledlule kushaqise abaningi ngoba ubesanda kubonakala emdlalweni weBlack Leopards eVenda, ngo-Okthoba 15 ewu-Match Commisioner. Ubewubani uMcCleod Uzalwe ngoMashi 1954
Waba wunompempe ngaphansi kweFifa ngo-1993. Ngo-1996, waqokwa ukuba adlalise emidlalweni ye-Africa Nations Cup eyayiseNingizimu Afrika, eyagcine inqotshwa yiBafana Bafana isacijwa wuClive “The Dog” Barker. Kuleyo midlalo wadlalisa umdlalo owodwa, owe-Algeria idla iSierra Leone ngo21.
Emidlalweni yeFifa Confederations Cup eyayingo-1997 wadlalisa imidlalo emibili, oweSaudi Arabia ibhekene neMexico noweBrazil ibhekene neMexico.
Ngo-1998 waqokwa ukuthi adlalise eNdebeni yoMhlaba eyayiseFrance lapho adlalisa umdlalo owodwa.
Ngemuva kokuthatha umhlalaphansi ekubeni wunompempe wasebenza kwiCosafa njengeMatch Commisioner.
Ubephinde abe wusihlalo weSouth African Football Association Technical Committee.
Yize uMcCleod ubedume kwezemidlalo nangamagalelo akhe kodwa ubenguthishanhloko. Ugcine ukufundisa eCrawford Preparatory School.
Enkonzweni yakhe yesikhumbuzo ebingoLwesibili, abafundi baseCrawford bamchaze njengothishanhloko obefana njengobaba. Omunye wabafundi, uthe: “Ubengesiyena nje uthishanhloko kepha ubengubaba kithina. Ubenothando oluyisimanga kithina bafundi.’’
Isikhulu seSafa, uDennis Mumble, uchaze uMcCleod njengomuntu obezihlonipha.
“U-Ian ubeyindoda eqotho, ubungeke umthole ediniwe. Ubezihlekela nawo wonke umuntu. Siphatheke kabi ngokudlula kwakhe emhlabeni,’’ kusho uMumble.
UMcCleod ulothiswe ngoMsombuluko.