UMicho ulila ngokugeja kwezakhe
AKENEME ngesimo sokugeja umqeqeshi we-Orlando Pirates, uMilutin “Micho” Sredojevic, nokuyisimo avumile ukuthi unesikhathi esincane sokusilungisa ngaphambi kokubhekana nePolokwane City emdlalweni weTelkom Knockout kusasa.
IPirates ikhale ngaphansi ngo 3-1 kwiMamelodi Sundowns emdlalweni we-Absa Premiership ngoLwesithathu ebusuku e-Orlando Stadium.
AmaBhakabhaka abengawunqoba nawo lo mdlalo noma okungenani athole iphuzu ukube awasebenzisile amathuba .
Umdlali osefomini kulezi zinsuku, uThabo Qalinge, ngomunye wabagange ngamathuba eyeka oqekelele ababili. UThembinkosi Lorch naye ulitholile ithuba esiwombeni sokuqala, uSredojevic akholwa wukuthi belingawushintsha umdlalo ukube lisebenzile.
Amagoli eSundowns ashaywe uHlompho Kekana (amabili) no-Anthony Laffor kwathi eleBucs labekwa enethi uMarc van Heerden obekuyi-free kick.
Kusasa iPirates izokwamukela iPolokwane City enkundleni efanayo emdlalweni we-quarterfinal yeTelkom ozoqala ngo-8.15 ebusuku.
“Ngiyaziqhenya ngendlela esidlale ngayo kodwa hhayi ngomphumela. Kodwa manje asisekho isikhathi sokubheka emuva. Sinamahora angu-72 ukulungiselela iPolokwane, sifike kuyona sesingcono kakhulu. Okusho ukusebenzisa amathuba esiwakhayo ngoba ayamangaza amathuba esiwayekayo. Kumele siphinde silungise nasemuva. Angeneme ngendlela esingenelwe ngayo amagoli,” kusho uSredojevic ngemuva komdlalo.
Mayelana nomphumela weSundowns uthe sesiside isikhathi iqembu eliphekwa uyena lingangenelwa amagoli amathathu “kodwa uncamele ukufa ezamile konokungazami lutho”.
“Akumnandi ukuhlulwa ngemuva kokudlala kahle. Siwatholile amathuba elinye lawo eliwele uLorch kodwa wehluleka eyedwa. Namanje ngiyazibuya ukuthi lingene kanjani igoli (elesibili likaKekana) ekude kangakaya yize ngazi ukuthi uyawashaya njengoba enza kwiCameroon. Sizibheke zonke izinto esingahlangabezana nazo kwiSundowns kodwa besingeke siqagule ukuthi sizongenelwa amagoli amabili umdlalo usephansi kodwa ekugcineni ngizitshelile ukuthi kunokuthi sihlulwe ngo 2-1, sizokwenza konke ukuze sithole igoli njengoba ngitshele uJustice Chabalala ukuthi aye phambili,” kusho uSredojevic.
Uthe ngeke agxeke uSandilands ngamagoli amngenelile.
“Awusoze wangizwa ngigxeka umdlali oyedwa ngokuhlulwa kwethu. (Ngesikhathi sekhefu) Ngihlale eduze kwakhe ngamtshela ukuthi okwenzekile sekufana nomlando akakukhiphe emqondweni, umdlalo ima uzoqala. Sibonile ngesiwombe sesibili ubesengcono. Ngincamela ukuqhamuka nesisombululo kunokuthi ngilibale ukugxeka,” kusho lo mqeqeshi odabuka eSerbia.
Ngesikhathi iPirates idlala neLamontville Golden Arrows koweTelkom Knockout Last ngempelasonto edlule, uSredojevic ubephobele uJackson Mabokgwane ezintini. Uma ebuzwa ngalokhu wathi ubenzela ukuthi abuyelwe ukuzethemba. Mhlawumbe kungenzeka ukuthi isisombululo sakhe ekuvimbeni iPolokwane kube wukubuyisa uMabokgwane emapalini.
Imidlalo yeTelkom Knockout (quarterfinal):
Kusasa: Platinum Stars v Bloemfontein Celtic (Royal Bafokeng Stadium, 3.30pm); Orlando Pirates v Polokwane City (Orlando Stadium, 8.15pm); Bidvest Wits v Baroka FC (Bidvest Stadium, 8.15pm)
NgeSonto: Chippa United v Kaizer Chiefs (Nelson Mandela Bay Stadium, 3.30pm)