Kuyaqhubeka ukuhlolwa kweS-Class
KUYAQHUBEKA ukuhlolwa kweMercedes-Benz S-Class ukuthi ingakwazi yini ukuzishayela ezindaweni ezahlukene.
IMercedes iqale uhlelo olubizwa ngeIntelligent World Drive embukisweni wezimoto iFrankfurt International Motor Show ngoSepthemba.
Ngemuva kokuqala eGermany, njengamanje iS-Class Saloon ihlolwa ukuthi ingakwazi yini ukuhamba esiminyaminyeni saseChina. Izophinde ibhekane nezimo ezahlukene emazwenikazi ahlukene kuze kube wuJanuwari wonyaka ozayo. IMercedes ithe inhloso yalokhu wukuthola kabanzi ukuthi yenzanjani bese ithuthukisa ubuchwepheshe.
Emigwaqeni yaseChina kuyaphithizela futhi indlela okubhalwe ngayo imigwaqo kunomqondo ohlukile nokwamanye amazwe. Ama-sensor emoto kumele akwazi ukufunda kahle lokhu nokuqonda ukuthi isho ukuthini into ebhalwe emgwaqweni. Okunye okuyinkinga kuleliya zwe wukuthi izindawo zokupaka zihlukene ngosayizi futhi isikhathi esiningi zinezinto eziphazamisayo okunzima ukuthi ama-sensor azithole.
Lokhu iMercedes ithe kukhombisa ukuthi kubaluleke kangakanani ukuthola emhlabeni jikelele ukuthi kunjani emgwaqeni ukuze kutholakale ubuchwepheshe bezimoto ezizishayelayo. I-Intelligent World Drive wuhlelo lokuhlola imoto ezihambelayo kugxilwe kwiS-Class. Ezinyangeni eziyisihlanu imoto ihlolwa ezimweni ezahlukene zomgwaqo ukuze izothola amava afanele.
Ngemuva kokuhlolwa eChina izobe isidlulela e-Australia kule nyanga naseNingizimu Afrika ngoDisemba.
Kuleli kuzobe kugxilwe kakhulu ekutheni ikwazi ukubona abantu.
Umlenze wokugcina wokuhlolwa uzoba seLas Vegas ngoJanuwari wonyaka ozayo.