Ubuchwepheshe obukwiNissan X-Trail
IMOTO: NISSAN X-TRAIL
NGASO sonke isikhathi izinkampani zezimoto zihlale zithuthukisa ubuchwepheshe ezimotweni zazo. Kungaba wubuchwepheshe bezokuxhumana, obokuqeda isithukuthezi uma ninohambo olude noma obokusiza umshayeli ukuthi agweme ingozi noma ukumenza akhululeke emgwaqweni.
INissan kwiX-Trail yayo yakamuva igaxe iNissan Intelligent Mobility (MIM).
Lobu buchwepheshe buhlanganisa obokutshela umshayeli uma kukhona imoto kwi-blind spot, obutshela umshayeli uma imoto isiphuma emzileni, uma umshayeli ephuma endaweni yokupaka iyakwazi ukumtshela uma kukhona izimoto eziqhamukayo, iyakwazi ukukulekelela ukubhreka uma kunesimo esiphuthumayo, iyamtshela umshayeli uma ingase ishayise imoto engaphambili, amalambu ayo ayakwazi ukuzicima u-bright uma kukhona imoto eqhamukayo futhi yenza kube lula ukuthi umshayeli apake ngokumgadela izinto ezingaba yingozi emaceleni.
Ngaphandle kwalobu buchwepheshe, bathuthukise nendlela ebukeka ngayo ngoba inamarimu ahlukene aphakathi kuka-17 no-19 inch. Ngaphambili ishaya nge-V Motion grille nobhampa okuyindlela okubukeka ngayo izimoto eziningi ezintsha zakule nkampani, amalambu bawahlele kabusha kanjalo nakhanya ubusuku nemini ama-day-time running lights.
Ngaphambili iphinde ibe namafog lamps ame ngenye indlela futhi ngemuva inamalambu angamaLED baphinde bayishintsha ubhampa.
Uma uthanda uyakwazi ukuthola enezihlalo eziyisikhombisa.
KwaNissan bathi uma ufuna iSUV encane baneJuke kuthi ephakathi kube yiQashqai. Maduze bazokwethula ingadlangadla iNissan Patrol.
Ngasezinjinini awukho umehluko ngoba kusekhona engu-2 litre kaphethroli enamandla angu-106 kW netorque engu-200 Nm. Idonsa ngamasondo angaphambili futhi ino-gearbox onamagiya ayisithupha ashintshwayo.
Enye yi-1.6 dCi turbodiesel ekhipha amandla angu-96 kW ne-torque engu-320 Nm. Nayo ino-gearbox onamagiya ayisithupha ashintshwayo.
Eyokugcina yi-2.5 lire kaphethroli ekhipha u-126 kW ne-torque engu-233 Nm eno-gearbox oyiCVT. Amanani 2.0 Visia R 369 900 2.0 Visia 7s R 374 900 1.6 dci Visia 7s R 392 900 2.5 Acenta CVT 4WD R 425 900 2.5 Acenta CVT 4WD 7s R 429 900 2.5 Acenta Plus CVT 4WD 7s R 444 900 1.6 dci Tekna 4WD R 457 900 2.5 Tekna CVT 4WD 7s R 469 900
I-Nissan X-Trail entsha iphuma ne-warranty yeminyaka eyisithupha noma u-150 000km, i-service plan yeminyaka emithathu noma u-90 000km kanjalo ne-roadside assistast yamahora angu-24 osuku. Kumele uyiyise kwisevisi njalo ngemuva kuka-15 000km.