Lungisa kahle isihlalo ubone kahle izibuko uma ushayela
indlela oshayela ngayo.
Uma ususiphakamise kakhulu isihlalo usengcupheni yokushayisa ngamadolo esiqwini sesiteringi lokho okwenza umpintsheke. Uma usisondeze kakhulu phambili ugcina sewuhleli ngokugoqana nokweza kube nzinyana ukususa unyawo uluse kwelinye iphedali.
Uma uhleli kabi nezibuko awukwazi ukuzibona kalula. Ngaphezu kwalezi zimo nomzimba wakho uyagqilazeka uma ungahleli kahle. Ungazithola sewuzwa ubuhlungu emahlombe, emqaleni noma emlenzeni noma ubanjwe ubuthongo kalula kanti yindlela ohleli ngayo.
Uma ushayela uqojeme uyafingqeka kube nzima ukuthi unyakazise izinyawo ngenkululeko nalokho ukwenza kube wubudluntudluntu ukushayela kwakho.
Umbono wama hazard uthi, lungisa isihlalo sakho kahle mshayeli ngaphambi kokuthi ususe imoto ihambe. Yizimoto zomjaho kuphela ezishayelwa wenabile ngoba nazo zakhelwe lokho.
Kubalulekile ukubona umbombo wemoto yakho ngesikhathi ushayela ngoba lokho kukwenza ushayele kangconywana ngaphandle kokuqagela ukuthi limi kanjani nokubona ngqo lapho kuhamba khona imoto yakho.
Nebhande lokuphepha kuhle ukuthi ulisondeze ngasehlombe libe maqondana nehlombe ukuze likugaxe kahle lingabi sentanyeni noma endlebeni ngoba lokho kungadala ukuthi likusike kabi uma kwenzeka isimo esiphoqa ukuthi likubambe.
Nokusondela kakhulu phambili akulungile ngoba kunciphisa ukukhululeka komshayeli kumenze ampintsheke.
Asethembe ukuthi sonke sizozilungisa izihlalo nalabo abashayela belele bazovuka bamise izihlalo zabo kahle. Ngalawo mazwi sesingawavala la awanamhlanje ama hazard sibuyele emgwaqweni sishayele ngokubuswa nokulandela yonke imithetho yomgwaqo ebusa lelizwe ukuze sihlangane sisawuphonsa umbalane nangesonto elizayo kuyo le ngosi.
Uma ufisa siyiqhube indaba ngena ekhasini lethu Igedlela Lami with Sthembiso Shangase kuFacebook. Ngale kwalokho yimi owenu nali ikheli ngezansi hazardiso@ gmail.com