I-EcoSport igabe ngamandla nangejubane

UMA ungumlandeli wale ngosi uzokukhumbula ukuthi phambilini sake sakuveza ukuthi ukuthengwa kwezimoto eziphakeme eNingizimu Afrika, nasemhlabeni jikelele kuyakhuphuka.

Kungalesi sizathu izinkampani nazo zingazibekile phansi ngokuqhamuka namaSport Utility Vehicle ukuze zingasali ngaphandle ekuzuzeni abathengi.

Enye yezimoto ezenza kahle emakethe esigabeni sama-compact SUV yiFord EcoSport. Ngemuva kokufunda le ndaba ngicela uqalaze ukuthi ngeke yini uyibone emgwaqweni ngoba isabalele.

Ukwanda kwayo akusilo nakancane iphutha okanye inxaphephe ngoba iyimoto esezingeni. Angikuveze futhi ukuthi iyimoto ezimele qekelele akukhona ukuthi iwumthobanhliziyo uma uhluleka wukuthenga ezinye zakwabo iFord Kuga okanye i-Everest zona ezinkulu.

I-EcoSport ihlukene ngezinhlobo ezintathu njengoba kukhona iTrend, Ambiente neTitanium okuyiyo ephezulu futhi ephuma nezinto eziningi. Yiyo futhi iTitanium esithole ithuba lokuhamba ngayo.

Phakathi kwezinto ephuma nazo kubalwa amalambu azikhanyelayo uma kumnyama, inama-sensor akusiza uma uhlehla, ixhuma iselula ngeBluetooth futhi inamabhathini esiteringini, idlala iCD futhi inendawo yokufaka i-USB, inamawindi kagesi nokunye.

I-centre console yayo “iwumhlobo mdi” ngoba ineFord SYNC endala futhi inoxhaxha lwamabhathini okungithathe isikhashana nokufunda ukuwasebenzisa kahle njengokubheka esinye isiteshi somsakazo.

Okuhle ngayo yisikhala sayo ngaphakathi ngenxa yokuthi abagibeli abahlanu bahlala ngokukhululeka futhi inendawo eningi yokufaka izigubhu phakathi nendawo kanjalo nasezicabheni ngemuva nangaphambili.

Uma uhleli ezihlalweni zayo zesikhumba uyezwa ukuthi uhamba ngemoto ephakeme futhi ewushiyile umhlaba.

Ukuteta kwayo isondo emhlane akugcini ngokwengeza ubuhle kodwa kwenza nokuthi ibhuthi libe likhulu.

Uma uyibuka ngaphandle inhle. Ngaphambili inamalambu amakhulu kanjalo nama-fog lamps. Inamasondo anamarimu angu-16 inch kanjalo namaroof rails okhakhayini.

Injini yayo ingu-1.5 litre TDCi kadizili enamandla angu-74 kW netorque engu205 Nm. Ngebanga lika-100km isebenzisa amalitha angu-4.6. Ngemuva kokuhamba ngaphezulu kuka-272km, ibisebenzisa amalitha angu-6.4. Ngaleso sikhathi ibisabika ukuthi isengahamba elinye ibanga elingu-368km.

Idonsa ngamagiya ayisihlanu ashintshwayo. I-EcoSport inamandla futhi amagiya ayo angena kalula. Okumnandi wukuthi uma ufuna inyuse isivinini asikho kangako isidingo sokuqala kabusha amagiya.

Ngakwezokuphepha iphuma ne-ABS ne-ESC, ama-airbag omshayeli nomgibeli, Emergency Brake Assist nokunye.

IFord yakhe imoto esezingeni ngeEcoSport. Inani Ford EcoSport 1.5 TDCi Titanium R311 900

Ifika ne-warranty yeminyaka emine noma ibanga lika-120 000km, icorrosion warranty yeminyaka emihlanu, service plan yeminyaka emine noma ibanga lika-60 000km neroadside assistance yeminyaka emithathu. Kumele iye kwisevisi ngemuva kokuhamba u-15 000km.