Usenkingeni umhlengikazi ohlambalaze obegula
USENKINGENI umhlengikazi wasesibhedlela saseMariannhill, iSt Mary’s othethise wahlambalaza isiguli (43) esishintsha inabukeni phambi kwezinye iziguli.
Umhlengikazi ubonakale kwi-video esabalale enkundleni yokuxhumana uFacebook izolo ethethisa isiguli, uNkk Nozipho Ngcobo, ethi ulele akafuni ukuzenzela lutho. UNkk Ngcobo waseHammarsdale kuthiwa ushone ngoLwesibili emuva kokuthi kwenzeke lesi sehlakalo ngoMsombuluko. UNkk Ngcobo, naye obengumhlengikazi emtholampilo ose-East London, kuthiwa ubengene esibhedlela ngesonto eledlule ekhishwa yisisu, ene-pneumonia nephika futhi engakwazi ukukhuluma kahle nokuhamba. Umhlengikazi uzwakala emthethisela ukuthi ufuna ukufaswa inabukeni.
“Angizokutshela njengonesi. Ngizokutshela njengowesifazane etshela owesifazane. Uwumama unezingane, ngeke ulale uthi ngicela ungenzela. Phela zama, unyakazise umzimba. Uzolala kanje kuze kube ulwesingaki? Uyafaswa ke inabukeni namhlanje. Nakusasa uzobe usafaswa inabukeni,” kubuza umhlengikazi ephakamisa izwi.
Umhlengikazi uqhubeka agcizelele umbuzo wakhe wokuthi uzofaswa kangaki inabukeni uNkk Ngcobo olele phansi kubonakala ukuthi akulula ukuthi anyakaze.
Uqhubeka amtshele ukuthi akangavumeli ukufa kudlale ngaye.
Ngokuhamba kwesikhathi ubonakala esemshintsha inabukeni kodwa emshintsha engawavalile amakhethini asuke ezungeze umbhede. Ngokujwayelekile uma kwenziwa lokhu ayavalwa.
Izolo, indodakazi kaNkk Ngcobo, uNksz Busiswa Ngcobo (27), ithe ithole ucingo luvela esibhedlela izolo emini bethi ayifike esibhedlela. Uthe bamtshele ukuthi sekune-video eveza unina ethethiswa ngumhlengikazi.
“Bengingakayiboni i-video ngesikhathi bengifonela. Kuthe uma sengiyibona ngaphatheka kabuhlungu ngacikeka ngenxa yendlela umhlengikazi amphathe ngayo. Besingekho isidingo sokuthi amthethise nokuthi aze amshintshe inabukeni phambi kwezinye iziguli. Amakhethini abesebenza kodwa wangazihlupha ngokuwavala,” kusho uNksz Ngcobo.
Uthe uzimisele ngokusibopha isibhedlela ngendlela aphatheke kabi ngayo unina okulindeleke ukuthi afihlwe ngoMgqibelo.
Ubuye wathi unina ubengakwazi kuzenzela lutho, ubefunzwa nguye nezihlobo zakhe uma zizombona. Uthe bebefike bamphendule benze konke abekucela.
“Ngiyazisola ngokumyisa esibhedlela. Besizitshela ukuthi uzothola usizo olungcono kodwa manje sengiyabona ukuthi ushone kukhona nokukhahlamezeka ngenxa yendlela aphatheke ngayo,” kuqhuba uNksz Ngcobo.
Izolo, uMnyango wezeMpilo KwaZuluNatal uthembise ukumthathela izinyathelo umhlengikazi.
Okhulumela umnyango, uMnuz Sam Mkhwanazi, usigxekile isenzo somhlengikazi. Uthe ukhombise ukungenzi ngendlela efanele esigulini ngesikhathi esishintsha inabukeni engawavalile amakhethini.
Uqhube wathi abaphathi besibhedlela iSt Mary’s bamatasa nodaba besebenzisa izinhlelo zoMnyango wezeMpilo