Kumiswe ukubhala ngempi yabafundi
KUMISIWE ukubhalwa kwezivivinyo esikoleni iMbuyiselo High, eMandeni ngemuva kokushaywa kulinyazwe umfundi ka-matric okusolwa ukuthi kuhlobene nempi yezigodi endaweni.
Kulesi sikole kubhala abafundi baka-matric abaqashwe amaphoyisa. Umfundi oneminyaka ewu-19 ofunda uGrade 12 kuthiwa ulalelwe unyendle ephuma kotadisha nabanye esikoleni, ngoMgqibelo. Kuthiwa ubeyithemba lesikole ukuthi uzobuya nemiphumela emihle njengoba eziphuzela kwiScience neMaths.
Ubesohleni lomnyango lwabafundi abayiziqengqe. Impi phakathi kwabafundi besigodi sakwaMhlongo nesakwaBiyela, yaqala ngo-2015 ibuye idambe. Ngemuva kokulinyazwa komfundi wesakwaMhlongo kusatshwa ukuthi kungase kuphazamiseke ukubhala kwaGrade 12.
“Le nto yenza nathi sifise ukuphindisela kodwa sibuye sibone ukuthi kuzophazamiseka ikusasa lethu njengoba sibhala,” kusho omunye umfundi.
Abafundi bathi impi iqala ngesikhathi kungcwekwa emicimbini ngezimpelasonto. Abehluliwe bayiqhube nasesikoleni.
“Sifunda siphethe ocelemba, izizenze nazo zonke izikhali ongazicabanga. Kwesinye isikhathi nakhona ekilasini uma uthisha engekho kuyaliwa,” kusho umfundi.
Umholi weDA eKZN uMnuz Zwakele Mncwango obevakashele esikoleni izolo, uthe ubezofuna ulwazi ngakho konke okwenzekile ukuze abone ukuthi angangenela kanjani odabeni. UDkt Barney Mthembu wezemfundo eKZN uthe: “Kubafundi bakaGrade 12 akekho ongabhalanga ngaphandle kwalo olimele, owesibili ulandwe ngamaphoyisa ekhaya wabhala.” Uthe kuzoba nomhlangano nabazali. UDkt Musawenkosi Madondo wezemfundo esifundeni iLembe uthe umfundi olimele uyelulama kodwa ngeke akwazi ukubhala, uzochibiyela ngonyaka ozayo. Inkosi Sifiso Biyela yesakwaBiyela ithe: “Njengoba sizohlangana nje nginethemba lokuthi sizophuma nesixazululo. Siwumphakathi kumele sibekezelelane.” Inkosi Mgwavumeleni Mhlongo ithe ayiphilile isesibhedlela.