Kuthiwa yimali ebulalise ababili eGlebelands
ngecala lokubulala uMnuz Sipho Ndovela owabulawa eNkantolo yeMantshi eMlaza, ngo-2015.
Isolezwe lisanda kubika ngomnqamulajuqu wangoLwesihlanu olwedlule obubekelwe abahlali basehostela ukuthi bakhokhe imali.
Izolo abahlali basehostela bathe kusolwa ukuthi uNdimande benoNtaka babulawe ngoba bengafuni ukukhokha le mali. Kuthiwa bekufanele bakhokhe u-R30 umuntu ngamunye. Le mali beyizogcwaliselwa kwenye eke yakhokhwa phambilini.
Omunye ohlala esitezi sabo, ocele ukuthi igama lakhe ligodlwe, uchaze uNdimande noNtaka njengabantu abebengazihlanganisi nezinto ezenzeka ehostela.
“Bebengabantu abebezisebenzela bengenaso isikhathi sezinxushunxushu nezinto ebezenzeka ehostela. Bebeke basho ukuthi abayithandi le ndaba yokuthi kulokhu kuqoqwa imali. Yingakho sikholwa wukuthi bashayelwe yona njengoba sebebulewe nje,” kusho lo mhlali.
Omunye umhlali uthe bekuvele kunokukhathazeka ngokuqoqwa kwemali ngoba kuvela izigameko uma iqoqwa.
“Okunye okwenzekayo wukuthi imali iqoqwa ngesibhamu. Abantu bayaphoqwa ukuthi bakhiphe imali ngisho bengahambisani nakho,” kusho umhlali.
Kuthiwa indoda eshone ngeSonto ibingeyasehostela eWema. Bekukade kusolakala ukuthi ingeyaseGlebe kodwa manje sethiwa ibivakashile.
Okhulumela amaphoyisa KwaZulu-Natal, uCol Thembeka Mbhele, ukuqinisekisile ukuthi amaphoyisa aphenya amacala amabili okubulala emuva kokubulawa kukaNdimande noNtaka.
Uthe asikaziwa isizathu sokubulawa kwabo. Bekungakaboshwa muntu.