Sebeziyagadela abakhala ngamaphoyisa
UMPHAKATHI waseMandawe ngaseScottburgh usuzibambele mathupha ukuqapha ezokuphepha endaweni ngemuva kwezigameko zokudutshulwa kwabantu ngeledlule, kwashona ababili kwalimala nabanye.
Izolo, Isolezwe lihambele le ndawo lapho kubulawe khona uNksz Makhosazane Mokoena noMnuz Siyabonga Ngcobo, kwadutshulwa nabanye.
Umphakathi uveze ukuthi usukhethe ukuba uziqaphele wona isimo ngoba kukhona izigebengu ezicanasayo endaweni ezibhema iwunga.
Umndeni kaNgcobo uveze ukuthi wabulawelwa u-R5 ayewuphethe usekhukhwini. Umsolwa wayezama ukumkhuthuza.
Umphakathi uveze ukuthi usuhlala ngokwesaba, yingakho usuqale umkhankaso wokuqapha ezokuphepha.
Amalungu omphakathi aseqale uhlelo lokuzulazula njalo kusukela ngo-5 ntambama ehamba eyiqulu, eqaphe abavela emsebenzini nabafundi abaphuma kotadisha.
Kuhanjelwe imizi esolwa ngokuhlala izigebengu kuyobhekwa izinto ezebiwe nokuthi ngobani abahlala kuyo.
Ilungu lomphakathi elingathandanga ukudalulwa lithe: “Kuyadumaza kakhulu ukuthi kukhona abantu abakwazi ukuvele badubule abanye bezihambela emgwaqweni bese kuyathuleka. Yingakho nje sesikhethe ukuba sizigadele thina indawo yethu,”kusho ilungu lomphakathi.
Omunye okhulume neSolezwe uthe kukhona nendawo enezihlahla ezihlangene abahlala bethola kuyo amakhadi asebhange nezikhwama zabantu kulahliwe.
“Sibonile ukuthi ukulinda amaphoyisa asiqaphele indawo, ngeke kusisize ngoba selokhu kubulawe abantu asiwaboni endaweni,” kusho omunye womphakathi.
Unina kaNgcobo, uNksz Jabu Ngcobo uthe: “Ingane yami ibulawelwe u-R5 ebiwuphethe. Akakwazi ukusheshe aphendule uma kukhona ombuza khona ngenxa yamalimi. Njengoba edutshulwe emlonyeni kungenzeka ukuba wayezama ukukhuluma.Uyena obesondla ngamatoho. Nangelanga abulawe ngalo ubeyolanda imali yakhe komunye umuzi abesebenza kuwo.” Amaphoyisa ewakaze afike kwakhe azomazisa ngophenyo.
Amaphoyisa acele noma ngubani ongaba nolwazi ngomsolwa athintane nawo.