Iyashoda eyokuthutha abafundi
UMNYANGO wezeMfundo KwaZulu-Natal uthi ukwazi ukuhlinzeka kuphela abafundi abangu-47 000 ngezinto zokuthutha uma beya ezikoleni ngoba ushoda ngemali.
UMnuz Kwazi Mthethwa, okhulumela uNgqongqoshe wezeMfundo uMnuz Mthandeni Dlungwane, uthe ngokomthetho kumele ngabe bahlinzeka abafundi abangu-90 000.
Umnyango uyalelwe yinkantolo enkulu yaseMgungundlovu ngoLwesibili ukuthi uhlinzeke abafundi bezikole ezingu-12 zaseNquthu ezisebenzisana ne-Equal Education (EE) eziyise lo mnyango enkantolo ngezinto zokubathutha kusuka ngo-Ephreli 1, ngonyaka ozayo.
“Asikaze sinqabe ukuhlinzeka abafundi ngezinto ezizobathutha kusuka ngo-2008.
“Sikhulu isibalo sabafundi abadinga ukuthuthwa ekubeni sibhekene nenkinga yokushoda kwemali emnyangweni,” kusho uMthethwa.
Uthe kulo nyaka wezimali u-R195 million ngowokuhlinzeka abafundi ngezinto zokubathutha.
Ngokwalo mnyango ukuze ukwazi ukuhlinzeka bonke abafundi ngezinto zokubathutha udinga ngaphezulu kuka-R600 million.
UMthethwa uthe bazosebenzisana noMnyango wezokuThutha esifundazweni.
“Okumele sikweze wukubheka ukuthi izinto ezithutha abafundi zikulungele yini ukuthwala abafundi ngoba asifuni ukubabeka engozini.
“Ukuze umfundi akwazi ukuhlinzekelwa ngento yokumthutha, kumele ahambe ibanga elingu-6km kuya phezulu,” kusho uMthethwa.
Uthe umnyango ukwazile ukuhlangabezana nalo mgomo ekubeni indawo eningi kulesi sifundazwe isemakhaya.
Ukuhamba amabanga amade ngezinyawo kwabafundi kwenza abanye bangayi njalo ezikoleni.
UMthethwa uthe bavumelene beyizinhlaka ezehlukene enkantolo ukuthi kumele kuhlinzekwe abafundi ngezinto zokubathutha uma kuqala unyaka wezimali ngonyaka ozayo.
Inkantolo iyalele umnyango ukuthi ulethe umbiko ngohlelo lwezokuthuthwa kwabafundi ngonyaka ozayo.
Inqume nokuthi kubhekwe ezinye izindlela zokuhlinzekwa kwabafundi ngezinto zokubathutha.
I-EE isishayele ihlombe lesi sinqumo ngoba ithi kudala izama ukunxenxa umnyango ukuthi uhlinzeke abafundi ngezinto zokubathutha.