Isinomholi webhodi omusha iBLSA
INHLANGANO yosomabhizinisi kuleli iqoke owesifazane ekubeni umholi webhodi ozokwengamela nakweminye imikhakha kwezamabhizinisi.
UNksz Busisiwe Mavuso uqokwe yiBusiness Leadership South Africa (BLSA) esikhundleni sokuba yiChief Operations Officer nomqondisi webhodi. Ukuqokwa kwakhe kulesi sikhundla kuhambisana nokuthi abhekele ezokusebenza kwenkampani, ezezimali, ezobuchwepheshe, izinhlelo nobulungu benhlangano. Kumele abheke nokwenziwa kwenqubomgomo nokulawulwa kwenhlangano. UNksz Mavuso ubekade engumqondisi wenhlangano yosomabhizinisi abamnyama, iBlack Management Forum (BMF) kusukela ngo-2009. Waqala waba yiChief Financial Officer kwiBMF ngaphambi kokuqokelwa ukuba ngumqondisi ngoMeyi wonyaka odlule.
Iphawula ngokuqokwa kukaNksz Mavuso iBLSA ithe ithole umholi onamava, ozovikela inhlangano aphinde abe yisishoshovu sokuletha izinguquko kuyona. UMnuz Bonang Mohale oyisikhulu esiphezulu seBLSA, uthe uNksz Mavuso ube namagalelo anzima nasezikhundleni asuka kuzo kwezinye izinkampani. “Ngaphansi kobuholi bakhe iBMF ikhule ngendlela emangalisayo kwezamabhizinisi, kwakhula ngisho umnotho wayo. Ukhuthaze, waqhuba umbono wokuthuthukisa ubuholi bosomabhizinisi abamnyama namakhono abo. Lezi ezinye zezinto esizifunayo nathi eBLSA, yingakho sinenkolelo yokuthi uzofika nokwehlukile.”
Ethimbeni elizosebenza noNksz Mavuso kubalwa uMohale, uMnuz Themba Maseko, ozoba nguMqondisi wezokuXhumana, uMnuz Sizwe Mbele onguMqondisi weziNhlelo noNksz Tebele Makhetha onguMqondisi wezeMigomo neMithetho.
Phakathi kweziqu zemfundo anazo uNksz Mavuso kubalwa iMasters in Business Leadership azithole e-Unisa School of Business Leadership, ezeManagement azithole eGordon Institute of Business Science neBachelor of Accounting Science Degree yaseUnisa. Uyilungu le-Association of Chartered Certified Accountants. Waqala ukungena emkhakheni wezezimali ngo-1995 kanti useke wasebenza kwezokuqeqesha kwezokuxhumana nakwezempilo ngaphambi kokuya kwiBMF.
Ephawula ngokuqokwa kwakhe yiBLSA, uNksz Mavuso uthe uzimisele ukubhekana nezinselelo ezihambisana nalesi sikhundla.
“Ngiyathokoza ukujoyina iBLSA ngalesi sikhathi esidinga ukuthi siqinise siphinde sikhuphule amazinga kwezokusebenza ngamabhizinisi. Ukuba kulesi sikhundla kuzovula ikhasi elisha emaveni ami kwezamabhizinisi,” kusho yena.
IBLSA yinhlangano emele izinkampani zamabhizinisi ezingaphezu kuka-70. Isanda kusayina isivumelwano sokuzibophezela ekufukuleni osomabhzinisi, ukuthuthukisa ezobuholi, ukudala amathuba omsebenzi nokulwa nenkohlakalo.