Ithuba lokulwela ele-WBC kuMchunu
UBONA ithuba lokulwela ibhande le-World Boxing Council (WBC) Cruiserweight umshayisibhakela waKwaZuluNatal, uThabiso “The Rock” Mchunu, obekuthiwa kuphelile kuye ngokushaya amaphiko esibhakeleni somhlaba.
UMchunu (18-3-0), waseCato Ridge, uzoxhimfana noConstantin Bejenaru odabuka eMoldova empini yebhande le-WBC Continental Americas Cruiserweight neleWBC International Cruiserweight ngoNovemba 25 e-United States. Impi kulindeleke ukuthi imvulele amathuba okulwela elomhlaba. Ngo-2015 uMchunu uhluleke empini yokuhlunga ozobhekana nompetha, ekhala ngaphansi ku-Ilunga “Junior” Makabu eThekwini. Sekuwumlando ukuthi naye uMakabu waseDemocratic Republic of Congo (DRC) ufike waphendulwa impuphu ngumpetha uTony Bellew ekubeni ekade esemvuse phansi.
“Uma ngiwina le mpi ngizodlulela kweyokuhlungela ibhande le-WBC noma ngizolwela lona. Ibaluleke kakhulu kimina. Ngizonyuka nasezilinganisweni ze-WBC,” kusho uMchunu.
Ibhande le-WBC lisesezandleni zikaBellew. UMchunu usengaphandle kwabashayisibhakela abagaqele leli bhande. Lokhu kusho ukuthi kufanele azinikele ngokuphindiwe ukuze awine kuBejenaru (120-0) oqale isibhakela esikhokhelayo ngo-2012. UBeneraju (33) uzovikela amabhande akhe kuMchunu awawine nyakenye ehlula uStivens Bujaj engaphethwe muntu. Akakaze ayilwe impi yesicoco somhlaba.
“Ukulungiselela impi nomshayisibhakela onjengaye kunzima kancane emqondweni ngoba akekho ezingeni labanye abaziwayo esibhakeleni somhlaba. Uma ulwa nebhokisa eliphezulu kuba khona emqondweni ukuthi kufanele uqaphele kakhulu. Kodwa umuntu ongena eringini kusho ukuthi uyakwazi ukushaya. Ngeke simthathe kancane,” kusho uMchunu.
“Simbonile ukuthi ulwa kanjani. Uyinxele elithembela emandleni kakhulu. Uza phambili ngaso sonke isikhathi.”
UMchunu ugcine ukungena eringini ngoJuni ehlula uJohnny “Hurricane” Muller empini yebhande le-SA Cruiserweight nele-African Boxing Union (ABU) Cruiserweight. Uzofulathela iNingizimu Afrika nethimba labaqeqeshi elizoholwa nguSean Smith weSmith’s Gym.