Abagijimi abanamava ezinguqukweni zokusubatha eKZN
UZONXENXA abagijimi abanamava ukuzolekelela ekuthuthukiseni ikhono labasubathi KwaZulu-Natal, uMichael “Sponge” Seme, omenyezelwe njengomqeqeshi ophezulu izolo.
USeme, osekhiqize abagijimi abaziwayo emhlabeni okukhona kubona uCaster Semenya, Gladwin Mzazi noSteven Mokoka, umenyezelwe yinhlangano eyengamele ezokusubatha kulesi sifundazwe, iKwaZuluNatal Athletics (KZNA) emcimbini obukade useMajuba Logde, eNewcastle, ngoLwesibili. Wethweswe umthwalo wokubuyisa isithunzi seKZN kwezokugijima. USeme uneziqu ze-Level 5 kwi-IAAF neze-Level 5 kwiSASCOC.
Uzophatha iKZN Athletics Academy ezoba seNewcastle lapho ezophinde athuthukise ulwazi lwabaqeqeshi abazovundulula ikhono ezikoleni nasezindaweni zasemakhaya.
“Ngijabule ngokuba kulesi sikhundla. I-KZN inekhono elidlula cishe zonke izifundazwe kwesokusubatha. Kuwumsebenzi wethu ukulivundulula, sililungise. Okubaluleke kakhulu wukucija abaqeqeshi ngaphambi kwakho konke ukuze abakutshalayo kuzoba yikhona. Kuningi abebekade bengakwenzi ngendlela efanele kodwa sizokukhuluma nabo emibuthanweni esizoba nayo. Ngikholwa wukuthi kuzoba lula uma sekukhuluma umuntu oqhamuka eceleni,” kusho uSeme.
“Ngizolanda abanye abagijimi ebengivele nginabo, abayiqondayo indlela engisebenza ngayo. Lokho kuzosiza ukukhuthaza abagijimi esikhungweni. Ngeke ngibantshontshe kubaqeqeshi babo kodwa kukhona vele abazoyithanda le nto esiyenzayo.”
I-KZNA imemezela uSeme nje kunoqhekeko kwazise kunamakilabhu okusubatha aseMgungundlovu afuna ukuphuma ngaphansi kwayo. Umengameli weKZNA, uSello Mokoena, kuthiwa amakilabhu awahambisani nobuholi bakhe.
Ngesikhathi kwethulwa uSeme, uMokoena akazange ayiphathe eyoqhekeko. Kunalokho ugxile ekuthuthukiseni ikhono.
“Besivele sidinga umqeqeshi osezingeni eliphezulu, hhayi noma ngubani. Sizobalanda abagijimi bangaphandle kwesifundazwe kodwa lokho kuzokwenziwa ngendlela efanele. Sizoqala ezikoleni ukuthuthukisa abagijimi,” kusho uMokoena.
“UJobodwana usekhona esifundazweni. Kodwa abagijimi bayazibonela uma kukhona okuhle okwenzekayo. Uma kukhona ofisayo ukuza eKZN sizomamukela, sikhulume nomqeqeshi wakhe.”