Ithemba kuKomphela ngokuqina kodonga
YIZE kubukeke sengathi umqeqeshi weKaizer Chiefs uSteve Komphela, ubegembula ngesikhathi enquma ukubophela uJoseph Molangoane njengomunye wabadlali abayibamba ezinhlangothini emuva kodwa kubonakala iqhinga lakhe limsebenzela njengoba besangenelwe yigoli elilodwa emidlalweni emihlanu.
UKomphela uyakugcizelela ukuthi abadlali bakhe basezinhlangothini bashoshele beyokwandisa isibalo uma kuhlaselwa, bese evala ngabadlali abathathu emuva.
IChiefs ayikahlulwa kule midlalo emihlanu kusukela esebenzise uPhilani Zulu, Eric Mathoho, Daniel Cardoso, Siyabonga Ngezana noMolangoane. Inqobe kabili kwiTelkom Knockout okuyifake kuma-semi final alo mqhudelwano. Iqhathwe neBidvest Wits emdlalweni oseBidvest Stadium ngo-3.30 ntambama ngoNovemba 18.
Kwiligi ithole amaphuzu amahlanu, ishaya iMamelodi Sundowns yadlala ngokulingana ne-Orlando Pirates nePolokwane City.
Phezu kokujabulela ukufaka iqembu kweyandulela owamanqamu, uKomphela uchazwe wukwehla kwesibalo samagoli esingene ngakubona.
“Muhle umphumela esiwutholile (beshaya iChippa United ngempelasonto edlule). Besikudinga lokho. Kodwa okungijabulisa kakhulu wukuthi emidlalweni emine noma emihlanu sisangenelwe yigoli elilodwa. Lokho kuqinisa ukuzethemba odongeni lwethu,” kusho uKomphela.
Lo mqeqeshi uthe njengoba ehlezi ebuzwa ngokunganqobi lutho selokhu ethathe izintambo kwiChiefs, kumasizini amabili edlule, wethemba ukuthi uzokwazi ukuthola imiphumela ezojabulisa emidlalweni ezayo yeTelkom Knockout.
“Sizodlala neWits kowandulela owamanqamu. Ngemuva kwalokho sibheke ukungena kowamanqamu lapho engethemba ukuthi sizoqhubeka nokudlala ngendlela esidlala ngayo bese sithola umphumela ozoba yimpendulo kulo mbuzo,” kusho uKomphela.
UKomphela uke wafinyelela kowamanqamu weTelkom neChiefs ngo-2015 kodwa bahlulwa yiMamelodi Sundowns ngo 3-1.
Uthe ukugxekwa kuyingxenye yomsebenzi awenzayo njengoba kukhona abakwenza ngendlela eyakhayo kodwa futhi bekhona “nabacasulayo”.
Amanye amaqembu azodudulana kowandulela owamanqamu yiPolokwane City ezokwamukela iBloemfontein Celtic e-Old Peter Mokaba Stadium ngoNovemba 19 ngo-3.30 ntambama.