Umcimbi okhethekile wabathandi bebhola
ABATHANDI bebhola baseThekwini bazozikholisa ngobumnandi, imidlalo yobungani nokuhlanganyela nezinye izilomo zikanobhutshuzwayo uma behlome ngethikithi lokuyongena eMoses Mabhida People’s Park.
Abagqugquzeli bomcimbi obizwa ngeWe Are Football baqhamuke nohlelo lokukhipha isithukuthezi ngokumema abathandi balo mdlalo nabadlali asebathatha umhlalaphansi ukuze kuzohlanganyelwa ndawonye kubhungwe ngale ntandokazi yomdlalo.
U-Errol Madlala, okwabaqhamuke nomqondo womcimbi, uthe inhloso wukuhlanganisa abalandeli nezintandokazi zabo endaweni ekhululekile.
“Ngenxa yokuthi umcimbi uqondana nempelasonto yomdlalo weBafana Bafana, ngoLwesihlanu kuzoba khona ubhazabhaza wethelevishini ozobe ukhombisa umdlalo. NgoMgqibelo kuzoba nomdlalo we-6-a-side, umqhudelwano weFifa 17 (Play Station), no-DJ abazobe benandisa. Lolu wusuku oluhle lokungcebeleka nomndeni ngoba izingane ezineminyaka engaphansi kuka-12 zizongena mahhala,” kusho uMadlala. IBafana izobe idudulana neSenegal ePeter Mokaba Stadium, ePolokwane, ngo-7 ebusuku emdlalweni wokuhlungela iNdebe yoMhlaba eseRussia ngonyaka ozayo. Amathikithi abiza u-R120 kanti uma usulithengile uzongena ngalo ngoLwesihlanu uphinde ulisebenzise nangoMgqibelo. Abathanda ukuba sendaweni yezicukuthwane bazowathola ngo-R1 499.
Atholakala e-TicketPro nakwiwebsite ethi-www. wearefootball. co.za naseMoses Mabhida. NgoLwesihlanu amasango azovulwa ngo-5 ntambama kanti ngoMgqibelo imidlalo izoqala ngo-9 ekuseni. Abafisa ukudlala bangabheka imininingwane kwi-website noma baye eMabhida.
Phakathi kwezinkakha ezizobe zikhona uma sekubukwa iBafana nasemidlalweni yangoMgqibelo, kubalwa uLucas Radebe, Doctor Khumalo noMacBeth Sibaya.
“Abathandi bebhola bazothola ithuba lokuxoxa nabo ngebanga eselihanjwe yiBafana kusukela yaqala ukudlala ibhola ezingeni lomhlaba,” kusho uMadlala.
Lona ngumcimbi wokuqala kanti uthe inhloso wukuthi ube khona ngoNovemba minyaka yonke.