ULarsen utusa ukuzinikela kukaKhune
UMQEQESHI weLamontville Golden Arrows, uClinton Larsen, utusa ubuqhawe bukanozinti weBafana Bafana, u-Itumeleng Khune, ocele ukudlalela iNingizimu Afrika elimele ngenxa yokubaluleka komdlalo.
IBafana izobhekana neSenegal emidlalweni emibili elandelana eduze yokuhlungela iNdebe yoMhlaba ezoba seRussia ngonyaka ozayo. Kufanele iyiwine yomibili ukuze ithole amaphuzu ayisithupha azokwenza ihlale phezulu kuGroup D eholwa iyona iSenegal ngayisishiyagalombili. Kusasa izodlala owokuqala ePeter Mokaba Stadium, ePolokwane ngo-7 ebusuku. Owesibili uzoba seDakar ngoNovemba 14.
Ukulimala ebusweni kukaKhune ovimbela iKaizer Chiefs, eshayisana noKurt Lentjies weChippa United emdlalweni we-quarterfinal yeTelkom Knockout ngempelasonto, kushaqise iNingizimu Afrika yonke. Iningi livele laphonsa ithawula ngokufinyelela kweBafana eRussia.
Nokho uKhune ucele ukuthi iSouth African Football Association (Safa) ilungise okokuvikela ubuso ukuze adlalele izwe lakhe nakuba lokhu kuncike ethimbeni lodokotela. Umqeqeshi weBafana, uStuart Baxter uthe isinyathelo salo nozinti sikhombisa umfutho nokulangazelela.
ULarsen ubezokwamukeliswa ngokusemthethweni yiPremier Soccer League (PSL) umklomelo weCoach of The Month ka-Agasti noSepthemba ezinkundleni zokuziqeqesha zaBafana Bes’thende izolo.
“Yilokho esikufunayo, yilowo moya esiwudingayo kubadlali bethu. Baningi abadlali abakwenzile emhlabeni abanye badlala befake “amakepisi” okuvikela ikhanda emuva kokulimala abanye okokuvikela ubuso. Ngiyaziqhenya ukuthi umdlali osezingeni lakhe uzimisele ukufaka okokuvikela ubuso ukuze alwele izwe lakhe,” kusho uLarsen.
“ISenegal iyashayeka. Ngibuke imidlalo embalwa indlela esiyidlalile. Ngichazekile ngendlela abadlali abamthathe ngayo uStuart.
“Uma singasebenzisa amathuba esiwakhayo singahlula wonke amaqembu ezwenikazi. Sonke siyabeseka. Sethemba ukuthi bazowathola amaphuzu ayisithupha siye eRussia. Sinabadlali abasezingeni eliphezulu abafana noThemba Zwane, Tau (Percy) noDolly. Ngethemba ukuthi bazowenza umsebenzi.”
Izolo ntambama, uBaxter uthe bazosebenzisa okokuvikela ubuso kuKhune ejimini ukuze ajwayele.
I-Arrows isendaweni yesibili kwi-log ngamaphuzu angu-15 emuva kwemidlalo engu-10. Isele ngamabili kwiBaroka eziholayo ngawu-17. Abafana Bes’thende basahlulwe kanye kule sizini.
ULarsen ubonge bonke asebenza nabo eqenjini okukhona kubona iphini lakhe uMandla Ncikazi nabaqeqeshi bamaqembu amancane uVusi “Kanu” Vilakazi, Papi “Ginger” Zothwane noLindani “Mantayi” Shezi.
“Ngethemba ukuthi lokhu kuzobagqugquzela abadlali ukuthi basebenze kakhulu kunalokhu.
“Angicabangi ukuthi kukhona obezitshela ukuthi emuva kwemidlalo engu-10 iBaroka, Arrows neCeltic bazobe bephezulu kwi-log. Ngicabanga ukuthi lokhu kwenza iligi ithakaselwe, ukungazi ukuthi kuzokwenzekani.
“Yilokho engihlala ngikushumayela zonke izinsuku ngethemba lokuthi sizoqhubeka nokukhiqiza imiphumela,” kusho uLarsen.