‘UBaxter kumele abophele okhilimu, bangangeni seliyoshona’
KUFANELE umqeqeshi weBafana Bafana, uStuart Baxter, abophele bonke abadlali abona ukuthi bazomenzela umsebenzi uma esehlanganisa isikimu azogadla ngaso neSenegal emdlalweni wanamuhla wokuhlungela iNdebe yoMhlaba.
IBafana izothuthana neSenegal emdlalweni oyimpinda ePeter Mokaba Stadium, ePolokwane ngo-7 ebusuku.
Umdlalo wokuqala owawungoNovemba nyakenye wanqotshwa yiNingizimu Afrika ngo 2-1 ngaphansi kuka-Ephraim Mashaba. IFifa inqume ukuthi uphindwe ngenxa yokuthi unompempe owayewuphethe watholwa enecala lokukhwabanisa umphumela.
ISenegal yafaka isimangalo kwiFifa ngemuva komdlalo.
Manje sekusho ukuthi iNingizimu Afrika kumele inqobe lo mdlalo nowasekuhambeni ngoLwesibili ukuze iye kwiNdebe yoMhlaba eRussia ngonyaka ozayo.
U-Amanda Dlamini, ohlaziya ibhola kwiSuperSport aphinde abe ngumdlali weBanyana Banyana, uthe akusekho ukuthi uBaxter abambe eyeka kodwa kumele abophele bonke okhilimu anabo.
“Phambilini uStuart imlimazile indlela abophele ngayo isikimu sakhe. Ubenza izinguquko sekonakele. Kulokhu kufanele aqoke abantu aziyo ukuthi bazomenzela umsebenzi, hhayi acabanga ukuthi bazowenza,” kusho uDlamini.
Kukhulunywa ngokuboshelwa kwezethenjwa nje, unozinti u-Itumeleng Khune, nguyena obekulindelwe ukuthi odokotela bathathe isinqumo ngaye ngemuva kokulimala iso ngempelasonto edlule.
Kuleli sonto uziqeqeshile neqembu futhi ubengabonakali njengomuntu onenkinga yokubona noma yezinhlungu.
NgokukaDlamini yize engangabazeki amagalelo kaKhune kodwa akumele kwenziwe sengathi usuke eyedwa enkundleni.
“Siyazi ukuthi ngaphandle kokuvimba uKhune ubuye akwazi ukuqala iminyakazo ehlaselayo. Kodwa ngibona sengathi isiyenziwa ihaba indaba yakhe, okuyinto engeyinhle kwabanye abadlali njengoba ingabaphazamisa. Ngisho nabanye onozinti ingabaphazamisa.”
Indaba engakhulunywa eyokuthi ngabe amagoli azoqhamuka kuphi noma ngabe ubani osezintini. Okumqoka kunakho konke kuyona yomibili imidllalo wukunqoba, okuzonikeza iBafana amaphuzu ayishumi, iqhwakele kuGroup D.
Emdlalweni odlule wokuhlunga iBafana yahlula iBurkina Faso ngo 3-1 wamagoli kaPercy Tau, Themba Zwane noSibusiso Vilakazi.
Amazwe ase-Afrika asengenile kwiNdebe yoMhlaba njengoba izomelwa amahlanu:
Nigeria ne-Egypt. Sekusele izikhala ezintathu. Amazwe ase-Afrika asethubeni
Group A - Umbango uphakathi kweTunisia ne-DR Congo. ITunisia idinga ukuwina noma idlale ngokulingana neLibya. Uma ihlulwa bese iDR Congo inqoba kwiGuinea kuzobhekwa umehluko wamagoli.
Group C - IMorocco kufanele ingavumeli ukuhlulwa yi-Ivory Coast. Uma kunqoba i-IVory Coast iyona ezoya eRussia.
Group D - INingizimu Afrika kumele ishaye iSenegal kabili, uma kungenjalo wonke amathuba azowela iSenegal. Uma iNingizimu Afrika inqoba kuzocaca ngoLwesibili ukuthi iliphi iqembu elizoya eRussia okubalwa neBurkina Faso neCape Verde.