Kuboshwe obulale ingane yeshende nomngani wayo
KUSOLWA isikhwele kowesifazane wasemjondolo eMandela, eClairwood, okuthiwa uzivumele ukuthi ubulale indodana yeshende lakhe nomngani wayo ngemuva kokwaliwa.
Owesifazane ongeke adalulwe ngoba akakaveli enkantolo, uboshwe ngoLwesihlanu kulandela ukuvuma emaphoyiseni ukuthi ubulale indodana yeshende lakhe uNjabulo Mangaye (10) nomngani wayo uLuyanda Msomi (10) abagcinwa ngoLwesine beya esikoleni bangabe besabuya emakhaya.
Isidumbu sikaLuyanda sitholwe eduze kwesiteshi sesitimela ngoMgqibelo ngemuva kokukhonjwa ngumsolwa eqhutshwa ngamaphoyisa. Kuthiwa isidumbu sikaLuyanda besikhombisa ukuthi waklinywa. Isidumbu sikaNjabulo asikatholakali, besisathungathwa izolo ntambama.
Izolo, umsolwa uphinde wahamba namaphoyisa kuyiwa edamini laseClairowood lapho ethe waphosa khona isidumbu sikaNjabulo. Amaphoyisa asibhekile isidumbu kodwa sangatholakala, kugcine kutholakale isikhwama sezincwadi sikaLuyanda.
Umsolwa kuthiwa uboshwe kulandela ukuthi omunye womakhelwane efonele unina kaNjabulo emtshela ukuthi ubone uNjabulo noLuyanda bedlala nezingane zomsolwa ngoLwesine. Abazali bezingane babikele amaphoyisa. Ehlonywa ngemibuzo umsolwa uvumile ukuthi zifikile kwakhe kodwa wathi zibuye zahamba waze wazinika nemali yokugibela.
Ithimba leSolezwe izolo lizifikele lapho bekuthungathwa khona isidumbu sikaNjabulo. Lilamele amalungu omphakathi namaphoyisa bematasa bethungatha.
Siye koshicilela isidumbu sikaNjabulo singakatholakali. Ngesikhathi Isolezwe lizama ukukhuluma nonina kaNjabulo lapho bekuthungwathwa khona isidumbu izolo, ingxoxo iphazanyiswe wumngani kayise kaNjabulo omyalele ukuthi angakhulumi nabezindaba ngoba bajahe ukwazi ukuthi yini eholele ekubulaweni kwengane.
Ngokuthola kweSolezwe umuzi kamsolwa ushiswe ngamalungu omphakathi ngoMgqibelo.
Ilungu lomphakathi elicele ukungadalulwa lithe bafice izitaputapa zomuthi emzini womsolwa.
“Sisola ukuthi le mithi umsolwa ubeyisebenzisele ukuzama ukubuyisa ishende lakhe ebelimale ngenyanga edlule,” kusho ilungu lomphakathi.
Lithe bathole ama-SMS efonini yomsolwa akhombisa ukuthi ubekhuluma nenyanga ebimtshele ukuthi kufuneka athole igazi lomuntu onegazi lesoka lakhe khona bezothaka kahle umuthi wokulibuyisa.
Okhulumela amaphoyisa KwaZuluNatal, uColonel Thembeka Mbhele, ukuqinisekisile ukuthi kuboshwe owesifazane nomunye umsolwa ngecala lokubulala nelokuthumba.
“Kuboshwe abasolwa ababili ngamacala okubulala nawokuthumba emuva kokutholwa kwesidumbu somfana ona-10. Abasolwa bazovela enkantolo maduze. Amaphoyisa asabheka isidumbu senye ingane,” kusho uMbhele.
Isolezwe lithole ukuthi omunye umsolwa oboshiwe ngowesifazane ongumngani wowesifazane obejola noyise kaNjabulo.