Usaqhaqhazela obone uyise efa ecindezelwe yiloli
INDODANA kaMnuz Mzwakhe Sibisi, uMnuz Mcebisi Sibisi (23) isaqhaqhazela emuva kokubona uyise esecindezelwe yiloli abebehamba ngalo bephuma emcimbini.
UMcebisi, waKwaGwetshana, eNquthu, utshele Isolezwe livakashele umndeni wakhe izolo ukuthi akazi usinde kanjani njengoba ephaphame uyise abehamba naye sekuthiwa ucindezelekile.
“Besigibele ndawonye nobaba. Ngibone iloli ligingqika. Kuthe sekubuya umqondo, ngayombheka ukuthi ungakuphi. Ngizwe kuthiwa ucindezelwe yiloli. Angikholwanga. Ngiye kuyena ngamnyakazisa ngizitshela ukuthi usazovuka. Kucacile ukuthi usedlulile ngoba ubengasanyakazi, bamumboza ngengubo,” kusho uMcebisi.
Uthe uyise ubeyinsika yomuzi, ebazamela konke yize ebengasebenzi.
“Akekho osebenzayo ekhaya. Ubaba ubenza isiqiniseko sokuthi siyadla. Kunzima kakhulu,” kusho uMcebisi obegodle ingalo ngenxa yokulimala engozini okushone kuyo abayisishiyagalombili.
Unina kaMcebisi washona ngonyaka odlule.
Ikhansela laku-ward 11 endaweni, uMnuz Bhekisizwe Ngobese lithe: “Amabhasi asinawo. Siyaphoqeleka ukuba sisebenzise amaloli athutha inhlabathi uma sihambela imicimbi.”
Uthe isigameko esifuze lesi sesiyaphinda ngoba ngo2002 kwenzeka ingozi efanayo beyoganisa kwenye indawo kwashona abantu abangu-11.
Kuleyo ngozi kwalimala nonina kaMzamo Sithole, oshonile, okuthiwa wayemkhulelwe ngaleso sikhathi. “Kusho ukuthi izingozi ezifana nalezi zizoqhubeka uma ezokuthutha zingalungiswa. Kuvalwe imizi eminingi, kwalimala nezingane zesikole,” kusho uNgobese.
Bangaphezu kuka-40 abantu abasagcinwe ezibhedlela ngemuva kwengozi.
“Ingozi yenzeke ngo-4 ntambama kodwa kuze kwashaya u-7:30 izidumbu zingalandiwe. Kube nzima kakhulu emindenini,” kusho uNgobese.
Isolezwe lithole ukuthi bekukhona abafundi baka-matric abathathu abalimalile engozini.
UMfundi waseMgazi High ofunda uGrade 10, uSfundo Sithole uthe bekumele abhale izivivinyo zakhe izolo kodwa akakwazanga ngoba ulaliswe esibhedlela.
Isolezwe ngesikhathi liya kule ndawo okushone khona omakhelwane isililo besiqhuma nxazonke. Abanye bexhuga ngenxa yokulimala. Nasesibhedlela iCharles Johnson Memorial bekugcwele kakhulu abantu bezobheka izihlobo zabo ukuthi zisindile yini. Ngenxa yobuningi beziguli, abahlengikazi nabasebenzi besibhedlela kuphoqelekile ukuba babuye noma bengasebenzi bezolekelela.
Abashonile: oMnuz Mzwakhe Sibisi, Mzamo Sithole, Phungabude Shabangu, Thandanani Magubane, Khethukuthula Ngcobo/Sithole, noNksz Nombuso Mkhwanazi, Andiswa Ndlovu noNtombela (igama alitholakalanga).