Usuthu lugaqele oweDowns
USUNGENELWE nangaMaZulu umbango womdlali wasemuva weMamelodi Sundowns, uKwanda Mngonyama, obhuquza ekhaya kusukela kuqale isizini ka-2017/2018.
UMngonyama ubekade ebolekiswe kwiMaritzburg United ngamasizini amabili edlule. Ngaphambi kwalokho iSundowns ibimbolekise kwiBidvest Wits lapho afike khona washaya into ecokeme ngaphansi komqeqeshi uGavin Hunt.
Nokho umqeqeshi weSundowns, uPitso Mosimane, akakaze ayibone indawo kaMngonyama eqenjini lakhe. UMngonyama akabhalisiwe yiSundowns kwiPremier Soccer League (PSL). Isolezwe lithole ukuthi AmaZulu angelinye lamaqembu afuna ukubolekwa lo mdlali.
Usuthu kusukela lubuyele kwiAbsa Premiership, lunezinkinga kubadlali basemuva abahlaselwe wukulimala okwenza kube nzima kumqeqeshi uCavin Johnson ukubophela inqanawe yesikimu. Ngaphandle kwaMaZulu, amaqembu afuna uMngonyama yiMaritzburg United egodole nemali yokumthenga ekuqaleni kwesizini, neWits okuthiwa iSundowns ifuna ikhokhe u-R6 million uma imfuna. Kuvele ukuthi iTeam of Choice inqabile ukukhipha u-R4 million obufunwa yiSundowns. Kuthiwa kwale noma sekuthiwa ayilethe u-R2 million kwazise noMosimane kunabadlali abekade ebafuna kwiTeam of Choice, okukhona kubona uDeolin Mekoa noBrian Onyango kodwa yangavuma.
Umthombo osondelene noMngonyama ukuqinisekisile ukuthi Usuthu luyamfuna lo mdlali.
“Kuyiqiniso ukuthi Usuthu luyamfuna uKwanda, izingxoxo zikhona. IWits nayo iyamfuna neMaritzburg. Inkinga ngeSundowns ukuthi ibheka ukuthi ufunwa yiliphi iqembu ukuze ibeke isamba semali eyifunayo. Umfana into ayifunayo wukudlala kodwa inkinga yiSundowns,” kusho uMthombo.
Usuthu lungelinye lamaqembu asevuzise amagoli amaningi kwiPremiership kusukela kuqale isizini kwazise selulande ezintanjeni angu-13 emidlalweni eyishiyagalolunye. Luzobuyela enkundleni ngoNovemba 22 uma selwamukela iKaizer Chiefs emdlalweni wePremiership eKing Zwelithini Stadium, eMlaza, ngo-7.30 ebusuku.
Imenenja kaMngonyama, uSizwe Ntshangase, ayitholakalanga ukuqinisekisa ngamaqembu afuna lo mdlali.
Okhulumela AmaZulu, uBrilliant Mkhathini, ungene ezintangeni ngendaba yokufuna uMngonyama.
“Ngokubuka ukuthi siyashoda, kunabadlali abalimele, kucacile ukuthi iqembu lizofuna ukuyibhekisisa leyo ndawo. Asifuni kodwa ukukhuluma ngezinto zabadlali okwamanje kodwa uma sekufike isikhathi iqembu lizophumela obala ngakho konke. Okwamanje iqembu liyaqhubeka,” kusho uMkhathini.
UThulani “TT” Thuswa weSundowns ubengalubambi ucingo izolo.