Lizophindwa iphepha eliputshuke enyuvesi
BAZOLIBHALA kabusha iphepha lePsychology abafundi abenza unyaka wesithathu eNyuvesi yaKwaZulu-Natal ngemuva kokuputshuka kwamaphepha amane alesi sifundo.
Kuthiwa lawa maphepha abesabalele ezinkundleni zokuxhumana okwenze ukuthi inyuvesi inqume ukuthi abafundi abathintekayo babhale izivivinyo zokuchibiyela. Babalelwa ku-1100 abafundi abazobhala kabusha.
Abafundi abathintekayo ngabenza i-semester eqale ngoJuni nonyaka. Kulindeleke ukuthi babhale ngaphambi kokuba kuphele lo nyaka.
Okhulumela inyuvesi, uNksz Normah Zondo, uthe bathole ulwazi ngokuthi kuputshuke iphepha lePsychology, ebeselibhaliwe.
Uthe uphenyo olwenziwe luveze ukuthi iphepha liputshukile njengoba bese lisabalele ezinkundleni zokuxhumana.
“Sinqume ukuthi siwathathe njengento engekho amaphepha abesebhaliwe kulesi sifundo. Sekwenziwe amaphepha amasha abazowabhala maduzane labo bafundi abathintekayo. Sifuna ukuthi kungabi nongabazane ngezivivinyo zenyuvesi yingakho sinqume ukuthi libhalwe kabusha leli phepha,” kusho uNksz Zondo.
Uthe bathathe izinyathelo zokuqinisekisa ukuthi akubi nokuputshuka kwamanye amaphepha ngokuthi baqaphe ngelokhozi izivivinyo.
“Okubuhlungu lesi simo sidale ukuthuka kubafundi nakubazali kanjalo nabafundisa enyuvesi. Yingakho sifuna ukuhlale njalo sinika abafundi ithuba ngokuthi baphinde bazibhale lezi zivivinyo.”
Uthe benza konke okusemandleni ukubamba abathinteka ekuputshukeni kwephepha.
“Sizobathathela izinyathelo zokubaqondisa ubugwegwe labo abathintekayo. Kuyadumaza ukuthi iqeqebana labantu selidale ukhwantalala kubafundi. Sibonga abafundi abaqondayo okwenzekile nokusebenzisana okuhle okukhona phakathi kwabo nabafundisa kule nyuvesi,” kusho uNksz Zondo.
Uthe bayaxolisa kwabaphazanyiswe yilesi sehlakalo.
Kunabafundi ezinkundleni zokuxhumana abebekhuluma ngokuthi bazophindiswa izivivinyo kulandela ukuputshuka kwaleli phepha.