Livele enkantolo ikhansela ngesitifiketi somkokotelo
LIVELE enkantolo yemantshi ikhansela laseKokstad elisolwa ngokuba nesitifiketi sikamatric esingumbombayi.
UMnuz Mfundiso Siglam uvele enkantolo yemantshi izolo ngecala lokukhwabanisa.
USiglam kuthiwa ufike esiteshini samaphoyisa ngoMsombuluko ezocela ukuthi amaphoyisa aqinisekise ukuthi amakhophi esitifiketi sakhe sikamatric enziwe ngesitifiketi esingungqo. Iphoyisa ebelimsiza kuthiwa limtshele ukuthi ngeke likwazi ukugxiviza amakhophi akhe ngoba isitifiketi singumbombayi.
Kuthiwa udinwe wagana umwabu elwa nephoyisa elitshela ukuthi alikwazi ukubuka ngamehlo isitifiketi sakhe bese limtshela ukuthi singumbombayi.
Iphoyisa limtshele ukuthi lihlale lizibona izitifiketi kodwa asikho esinjengalesi. USiglam ulitshele ukuthi akuwona umsebenzi walo ukubheka isitifiketi esingungqo kodwa umsebenzi walo ukubheka ukuthi ikhophi yenziwe ngalesi sitifiketi, uma kufana ligxivize.
Uthe umnyango wezemfundo kuphela ongaqinisekisa ukuthi isitifiketi sakhe singugqo noma singumbombayi hhayi iphoyisa.
Ugcine esesola iphoyisa ngokumehlisa isithunzi lithi uphethe umbombayi.
Okhulumela amaphoyisa kulesi sifundazwe, uColonel Thulani Zwane, uthe kusuke isidumo ikhansela lixabana nephoyisa okuphethe ngokuthi iphoyisa lize lifonele emnyangweni wezemfundo.
“Abomnyango wezemfundo bathe izinombolo ezibhalwe esitifiketini zingumbombayi, kwaba ukuboshwa kwakhe uSiglam,” kusho uZwane.
Uqhube wathi amaphoyisa avule icala lokukhwabanisa.