Babambe umoya abakhosele etendeni
BABAMBE umoya abahlala emijondolo esemgwaqweni uForeman, eSydenham, abakhoseliswe etendeni ngenxa yemvula elokhu iyidlive kusukela izolo.
Ingxenye yaleli tende bese ilele phansi ngenxa yomoya obuhambisana nemvula.
Imijondolo elinganiselwa ku-1 000 icekelwe phansi ngumlilo ngeSonto, kwashona uMnuz Eric Mpanza, unina wengane yakhe, uNksz Mbali Xulu, nengane yabo uSisipho.
UMnuz Simlindile Nomvete, osekomitini lokuthuthukiswa komphakathi, uthe umasipala ubathembise ukuthi namhlanje uzoqala ukwakha kabusha imijondolo eshile.
“Umasipala uvule izandla wathi asisho ukuthi sifuna ukuthi usakhele kabusha imijondolo noma usinikeze izimpahla zokwakha sizakhele. Njengamanje umphakathi ubungakasithathi isinqumo sokuthi kuzokwenzekani. Umasipala ufuna ukuthi sakhe ngendlela yokuthi kube lula ukuthi kufakwe ugesi. Okubi wukuthi isimo sezulu sibona sengathi ngeke sivume ukuthi kuqale kwakhiwe,” kusho uNomvete.
Ingxenye yomphakathi oficwe yiSolezwe ibikhathazekile ngenxa yokuthi itende bekubonakala ukuthi lingawa noma yinini ngoba izikhonkwane bese zithambile ngenxa yomoya.
UNksz Thobeka Majeke nabanye omakhelwane bakhe bebemi ngezinyawo etendeni. Uthe kunzima, akazi ukuthi bazolala kanjani ngoba indawo isinciphile ngenxa yamanzi abengena etendeni.
“Angiboni ukuthi lolu hlelo lukamasipala luzoqala ngenxa yemvula, okusho ukuthi ngempelasonto sizobe sihleli kulo leli tende,” kusho uNksz Majeke.
UNomvete uthe alikho ihholo eliseduze elingasetshenziselwa ukukhoselisa abantu.
“Uma kungenzeka umasipala usitholele ihholo kukhona futhi abazoba nenkinga ngoba basebenza eduze kwalapha,” kusho uNomvete.
UMnuz Mqapheli Bonono uthe etendeni kunabantu abagulayo abangazi ukuthi bazobenzenjani uma liwa.
Okhulumela umasipala weTheku, uNksz Tozi Mthethwa, uthe ithimba lezinhlekelele lisiqaphile isimo.
Uthe umasipala usabonisa nabathintekayo mayelana nokuthi kuzokwakhiwa kanjani.
UNomvete uthe basazama ukuthola imindeni yabashonile.
“UNksz Xulu owaseShowe kuthiwa akasenabo abazali. Kunomfowabo okuthiwa ulapha eThekwini kodwa akekho onezinombolo zakhe. UMpanza owaseMozambique kuthiwa unomfowabo ohlala eMlaza naye asazi ukuthi sizomthola kanjani,” kusho uNomvete.