Kuphenywa ngokubulawa kosomatekisi ababili eHighflats
AMAPHOYISA athungatha ababulali kulandela ukudutshulwa kosomatekisi ababili baseHighflats ngoyaba lwezinhlamvu ngoLwesibili.
Osomatekisi abasebenza kusoseshini waseHighflats kuthiwa babesemotweni ngesikhathi kuqhamuka imoto engaziwa ihamba abasolwa, abafike bavulela ngenhlamvu.
Isigameko senzeke ngasesikoleni iHighflats emgwaqweni u-R612.
Okhulumela amaphoyisa KwaZulu-Natal uLt Colonel Thulani Zwane uthe baphenya amacala amabili okubulala.
“Abasolwa badubule laba ababili bababulala, base bebaleka endaweni yesigameko. Imbangela yokubulawa kwabo ayikaziwa. Amaphoyisa aseHighflats aphenya amacala amabili okubulala. Akekho osaboshiwe kodwa uphenyo luyaqhubeka,” kusho uZwane.
Amaphoyisa acele abanolwazi ukuba bawathinte.
Umthombo weSolezwe ongathandanga ukudalulwa uthe kusolwa wona umsebenzi wamatekisi ngokubulawa kwalaba.
“Omunye umnikazi wamatekisi kulaba abahlaselwe (emdalula ngegama) sewake wahlaselwa nonyaka bezama ukumbulala kodwa bahluleka. Kubangwa wona umsebenzi yize kungacaci ukuthi yini ebifuneka,” kusho umthombo.
Imenenja kwi-Santaco eKZN uMnuz Sfiso Shangase ithe nabo baphithene amakhanda ngokubulawa kosomateki.
“Asazi manje ukuthi yikuphi okumele sikusho ukuze kuphele ukubulawa kwabantu kule mboni. Sekwanele manje, asikho isidingo sokuba abantu babulalane uma kukhona abangakuboni ngaso linye. Kumele sifunde ukuhlala phansi sixoxisane kule mboni,” kusho uShangase.
Uthe bazolulandelela udaba lwaseHighflats ukuthola ukuthi ikuphi inkinga.
“Siyathola ukuthi indaba yemizila iyona eyinkinga kakhulu kososeshini. Okubuhlungu wukuthi kukhona abantu abanobugebengu embonini abahlose ukubulala abanye abantu,” kusho uShangase.
UShangase uthe abanolwazi ngalokhu kuhlaselwa ucela bathinte imboni noma bethinte amaphoyisa ukuze bezoboshwa ababulali.
Imizamo yokuthola imindeni yalaba somatekisini ababulewe ayiphumelelanga izolo kwaze kwashaya isikhathi sokushicilela.