Izishoshovu zigxeka ubuholi beZanu-PF
NgoMsombuluko umkhuzi wamasosha uGeneral Constantine Chiwenga osebe kwiZDF kusukela ngo2004 ukhiphe isexwayiso esithi amasosha ngeke ananaze ukungenela kwezepolitiki emuva kokususwa esikhundleni kobeyiPhini likaMugabe uMnuz Emmerson Mnangwagwa ngesonto eledlule.
Izolo iZDF imemezele ukuthi uMugabe nomndeni wakhe baphephile ngoba amasosha abhekene nezigebengu ezimkakile.
UNobhala Jikelele weZCP uMnuz Ngqabutho Mabhena uthe amasosha avikela uhlangothi lweZanu-PF oluholwa nguMnangagwa njengoba kuzoba nengqungquthela eyisipesheli ngenyanga ezayo.
“Akuyona impi yemibono kodwa yimpi yokuthi ngubani okufanele adle imali yezwe ukudlula omunye” kusho uMabhena.
Uthe kuhlukene imibono kubantu baseZimbabwe abasahleli kuleliya lizwe nabokwamanye amazwe ngesinqumo seZDF. Uveze ukuthi abanye beseka amasosha, bathemba ukuthi azokwazi ukukhulula izwe.
Uthe abanye abantu baseZimbabwe bayasaba ukuthi amasosha angase avale intandoyabantu.
UMnuz Gabriel Shumba weZimbabwe Exiles Forum akathandanga ukuphawula ekhala ngokuthi abazi nokuthi kwenzekani, basacele abangani nemindeni ukuthi iphenye.
UMnuz Siphosezwe Masango onguSihlalo wekomiti elibhekele izindaba zangaphandle ePhalamende kuleli uthe abafuni ukubonakala bengabantu abagxambukelayo kodwa bazoludingida lolu daba futhi uthemba ukuthi ubuholi beSADC buzoza nesixazululo.
I-Amnesty International ngomlomo kaMnuz Deprose Muchena ithe kubalulekile ukuthi amasosha aqinisekise ukuphepha kwabantu baseZimbabwe noma ngabe baseka liphi iqembu.
UMuchena uxwayise ngokuthi ukungena kwamasosha embusweni kungaphazamisa ukuvikelwa kwamalungelo abantu.