UMugabe uzocacisa namuhla ngesikhundla
KUSHONE elayizolo kungakacaci ukuthi ngabe uMengameli waseZimbabwe uMnuz Robert Mugabe usabusa kuleli lizwe noma useketuliwe yini emuva kokusabalala kwemibiko yokuthi obeyiPhini lakhe uMnuz Emmerson Mnangwagwa usephethe esizwa ngumbutho wezokuvikela.
Izolo amasosha abenkanise enhlokodolobha yaseZimbabwe iHarare.
Isazi sepolitiki esizimele, uMnuz Thabani Khumalo, sithe okwenzeka eZimbabwe wukuketula umbuso ngendlela ehlelekile okusho ukuthi akukho gazi elichithekayo.
“Okwenzeka eZimbabwe kuqale kwasididida kodwa kuketulwa umbuso. Wukuketula umbuso okusha, okuhlelekile okuqala ngqa e-Afrika kwazise ngokujwayelekile kuvame ukuthi kuchithwe igazi,” kusho uKhumalo.
Uthe uMugabe wehlelwe ngamandla futhi uzakhele isigcwagcwa ngokuzama ukufaka umkakhe esikhundleni sokuhola iZanuPF.
Ebuzwa ukuthi ngabe iSADC inawo yini amandla okumisa izinhlelo zokuketulwa kukaMugabe, uKhumalo uthe iSADC ne-African Union (AU) yizinhlangano ezisemabhukwini kodwa azikwazi ukuthatha izinqumo ezinqala nokukhuza abaholi abenza okuphambene nomthetho.
“Abaholi be-SADC nabe-AU benza okufanayo nabenza izinto eziphambene nomthetho ngakho abakwazi ukukhuza,” kusho uKhumalo.
Ngokomthombo we-African News Agency (ANA) izolo uMugabe, uxoxe nombutho wamasosha ngokuthi uzokwehla esikhundleni sokuba ngumengameli uma inkosikazi yakhe uGrace izovunyelwa ukuyohlala kwelinye izwe, okungenzeka kube yiNingizimu Afrika.
Umthombo uthi uMugabe uzomemezela ukwehla esikhundleni esithangamini nabezindaba namhlanje.
“UMugabe uxoxe nombutho wamasosha ukuthi uGrace ashiye kulelizwe, yena uzobe elungiselela ukwehla esikhundleni. Isithangami nabezindaba sizoba namhlanje ntambama. Umengameli nonogada bakhe bavinjezelwe amasotsha ombuso,” kusho umthombo.
Amasosha ombuso ngoLwesithathu aqinisekise izindaba zokuketulwa kombuso ngaphandle kokuchitha igazi, athe uMugabe nenkosikazi baphephile.
Lokhu kulandela ukususwa esikhundleni kukaMnangagwa, ngesonto eledlule. UMnangagwa umeseke kakhulu uMugabe eminyakeni edlule.
Ukususwa esikhundla akwehlanga kahle kwabaningi, kwabonwa njengesinqumo esithathwe nguNkk Mugabe okuthiwa ugaqele izintambo uma umyeni wakhe esehla kwesikamengameli.
I-EFF ithe iNingizimu Afrika kufanele inike uMugabe indawo yokuhlala uma eketulwa.
Ihhovisi likaMengameli Jacob Zuma, linxuse abaseZimbabwe ukuthi behlise amaphaphu lathi iSADC izongenelela.
Umholi weDA uMnuz Mmusi Maimane ucele uMugabe ukuthi ehle esikhundleni ukuze isimo sizobuyela kwesijwayelekile eZimbabwe. Ukhale ngokuthi ukuqhubeka nokuphatha kudala izinkinga emnothweni waleliya lizwe.
UMnuz Narend Singh we-IFP ugqugquzele uhulumeni waseNingizimu Afrika ukuba ungenelele odabeni lwaseZimbabwe ngoba okwenzeka khona kuzoba nomthelela kuleli.