Oshayelela imeya usolwa ngokushaya
KUSOLWA isikhwele koshayelela iMeya kaMasipala yaseMuziwabantu okuthiwa uvulele ngempama kowesifazane obesemalile emphoqa ukuthi ahlukane nesoka elisha.
UMnuz Dumisani Cwele (44) kuthiwa uvulele ngempama kowesifazane (33) oyimenenja yomunye weminyango kamasipala kubuka abantu, esuphamakethe eHarding, ngoMgqibelo. Uvele enkantolo yemantshi izolo.
Kuthiwa uCwele nowesifazane bake bathandana phambilini kodwa baxabana. Owesifazane wabe eseqoma omunye usomabhizinisi. Lokhu kuthiwa akwehlanga kahle kuCwele obesenethemba lokuthi basazobuyelana.
Kuthiwa ubecikeka uma ebona owesifazane etetemuka nosomabhizinisi okuthiwa unebhizinisi lokungcwaba endaweni.
Umthombo ozibonele ngokwawo kwenzeka lokhu uthe owesifazane ubezihambela yedwa egilosa esuphamakethe ngesikhathi ehlangana nowayeyisoka lakhe. “Ngesikhathi behlangana uCwele uvimbe inqola yakhe yezimpahla. Baxoxa ngemuva kwesikhashana kuzwakale uCwele ethi: “Akehlukane no... (emusho ngesibongo). Angizwanga ukuthi owesifazane uphendule wathini. Ngibone esededela impama ephindelela kowesifazane, maqede wahamba,” kusho umthombo.
Okhulumela amaphoyisa esifundazwe, uCol Thulani Zwane, uthe owesifazane oneminyaka ewu-33 uvulele indoda eneminyaka ewu-44 icala lokushaya esiteshini samaphoyisa eHarding.
“Umsolwa uvele enkantolo yemantshi namhlanje. Mayelana nokuthi kwenzekeni enkantolo, angikabi nalo ulwazi ngoba idokodo alikabuyi enkantolo,” kusho uZwane.
Imeya yomkhandlu, uNkk Dixie Nciki, ithe ibingenalo ulwazi lokuthi abasebenzi bakhe bavulelene amacala.
“Ngiyaqala ukuzwa ngalokhu. Ngeshwa angikho kwamasipala ngikomunye umhlangano. UCwele akafikanga namhlanje (esho izolo) emsebenzini kodwa ngicabange ukuthi uvinjwe yisimo sezulu. U .... (esho igama lakhe) ngimbonile kancane ekuseni sabingelelana kodwa akazange asho lutho ngodaba. Uphiko lwezimoto lungaphansi kwemenenja kamasipala, ngisazohlangana nayo sibonisane ukuthi udaba lungasingathwa kanjani,” kusho uNkk Nciki.