Ifuna ikhomishini ezophenya inkohlakalo
NGEKE iphele inkohlakalo uma kushiywa ngaphandle osopolitiki nabaholi kwezamabhizinisi ezinhlelweni zokulwa nayo.
Lokhu kushiwo nguMnuz Peter Goss onguMqondisi weSizwe Ntsaluba Gobodo, inkampani ecwaninga amabhuku ezinkampani. UGoss obekhuluma engqungqutheleni yokuxwayisa ngokukhwabanisa eThekwini, uthe inkohlakalo idla lubi emabhizinisini amakhulu. Uthe emihlanganweni ephezulu yosomabhizinisi nosopolitiki, yilapho inkohlalalo enkulu iqala khona kodwa kujwayele ukujeziswa abantukazana.
“Ukulwa nenkohlakalo kungaphezu kokuxwayisa ngayo kodwa kumele abantu baqale bavume ukuthi inkohlakalo ikhona. Inkohlakalo ayikhethi bala futhi kumele igwenywe ingakaqali. Kumele izinkampani zichithe imali ekwakheni izindlela zokulwa nayo,” kusho uGoss.
UGoss oneminyaka eyisithupha ephenya amabhuku ezikampani, uthe ngeke iphele inkohlakalo uma kusacatshangwa ukuthi ngeyabathize kuphela.
“Usenkingeni uma usazolokhu ukhomba uZuma noma imeya ngenkohlakalo, ukhohlwe ngosomabhizinisi abayenza begqoke othayi. Ukweba kwangempela kwenzeka emihlanganweni emikhulu yezikhulu eziphezulu emabhizinisini,” echaza.
Ukhuthaze ukusungulwa kwekhomishini ezimele ephenya ngenkohlalao kuleli ukuze kuphele lo mkhuba.
Oyisikhulu se-Association of Certified Fraud Examiners uMnuz Jaco De Jager, uthe alikho izwe elingenayo inkohlakalo. Uthe izinkampani ezizimele nezikahulumeni zithikamezeka ngokulinganayo ngenxa yenkohlakalo. Uveze ukuthi i-ACFE iphenya amacala amakhulu enzeka emabhizinisini.
U-Advocate Bulelwa VimbaniShuma oyiNhloko yeSpecialised Commerical Crimes Unit KwaZuluNatal, uthe inkohlakalo iphezulu kuleli futhi uma kungenziwa okunye izwe lisenkingeni. Uqale ngokukhumbuza izethameli zengqungquthela ngokubulawa kukaMnuz Andries Tatane ngo-2011, owadutshulwa ngamaphoyisa ebhikishela izidingo zentuthuko. Uthe uma ingaqedwa inkohlakalo baningi abasazoba yizisulu ngenxa yokungayitholi intuthuko.
“Abantu basazoqhubeka bahlupheke bangayitholi imisebenzi ngenxa yabathize abenza inkohlakalo. Umphakathi uthwele kanzima ngenxa yenkohlakalo evimbela intuthuko,” kusho uVimbani-Shuma.
Uthe uphiko lwakhe luphenya amacala enkohlakalo kuhulumeni nasezinkampanini ezizimele. Uthe bashushisa kwasani abakhethi ukuthi owenze icala ukuluphi uhlangothi. Ugcizelele nokuthi ziyashushiswa nezikhulu eziphezulu kuhulumeni nasezinkampanini uma kutholakala ukuthi bezazi ngenkohlakalo kodwa zithule.
IFraud Awareness Week iqhakanjiswa njalo ngoNovember 12- kuya ku-18 emhlabeni jikelele ngenhloso yokuzama izindlela zokulwa nenkohlakalo.