UMasipala weTheku ulwa nezenzo zenkohlakalo
ANGU-20 amacala aphenywa amaphoyisa athinta ukukhwabanisa nenkohlakalo kuMasipala weTheku futhi usazimisele ukulwa nalo mkhuba.
Lokhu kuvele izolo engqungqutheleni yokulwa nokukhwabanisa, ehambisana ne-Anti Fraud Awareness Week egujwa umhlaba wonke kuze kube uMgqibelo.
UMnuz Nkosenhle Madlala obemele iMeya yeTheku, uNkk Zandile Gumede, uthe inkohlakalo iphazamisa ukulethwa kwentuthuko emphakathini, yingakho umasipala uzibophezele ukulwa nayo. Uveze ukuthi umasipala wasungula uphiko oluphenya ngenkohlakalo iCity Integrity and Investigation Unit (CIIU) ngenhloso yokulwa nalo mkhuba. “Lolu phiko luthola izikhalo ezihlobene nenkohlakalo, ukukhwabanisa bese liyaphenya. Siyanxusa ukuthi umphakathi nabasebenzi bakamasipala bakukhuthalele ukubika ngenkohlakalalo.”
UMadlala uthe umasipala uzishaya isifuba ngokuqhamuka nezindlela zokuzama ukuqeda inkohlakalo futhi nemiphumela iyabonakala. Ebala ezinye izigameko eziyimiphumela yokusungulwa kophiko oluphenywayo, uthe kuboshwe oyedwa obesolwa ngokudayisa izindlu zomxhaso zaseCornubia ngokungemthetho, okumanje ungaphandle ngebheyili. Kuthiwa lo msolwa uphinde waqhubeka nalo mkhonyovu esengaphandle ngebheyili, okumanje ufunwa ngamaphoyisa. Kwesinye isigameko uthe kuboshwe izikhulu ezimbili ebezidayisa izikhala zemisebenzi, nazo ezingaphandle ngebheyili. Kuboshwe nababili abakokotele izincwadi zokuhola befuna ukuthenga izimoto, kwesinye isigameko omunye waboshelwa ukukhipha ngokungemthetho izincwadi zekhansela.
“Sesikwazi ukuqwashisa ngenkohlakalo nokukhuthaza umphakathi ukuthi ubike ngayo ngenxa yezinhlelo zethu zokulwa nalo mkhuba. Sizimisele ukuba umasipala ongenachashazi uma kukhulunywa ngenkohlakalo nokukhwabanisa.”
UMnuz Musa Ngcobo oyiNhloko yeCIIU kuMasipala, uthe lolu phiko lusebenzisana nethimba lezokuphatha ukuqinisa emigomeni yokulwa nenkohlakalo. Uveze ukuthi banomcwaningi mabhuku wangaphakathi futhi basebenzisana nezinhlaka eziningi zomthetho ukubamba abenzi benkohlalo.
“Sekuyiminyaka emithathu sinale ngqungquthela yokuqwashisa ngenkohlakalo eThekwini, okukhombisa ukuzibophezela kwethu ekulweni nayo. Siyaziqhenya ngokuba umasipala wokuqala kuleli ukusungula ibhodi lokuqondisa ubugwegwe, ukuze kuliwe nenkohlakalo. Kuleli bhodi sinongoti ezindabeni ezithinta abasebenzi nezikhulu eziphethe ezezimali ezinesipiliyoni esinzulu kwezemisebenzi kahulumeni,” kusho uNgcobo.
Unxuse umphakathi ukuthi usebenzise inombolo yamahhala ethi: 0800 20 20 20, ukuceba abenza inkohlakalo.