Owe-EFF uzovusa inhlangano eKZN
LIZOYIBAMBA KwaZuluNatal ilungu lePhalamende le-EFF elishiya ePhalamende likazwenke ekupheleni konyaka kule nhlangano.
UMnuz Sipho Mbatha (47), utshele Isolezwe izolo ukuthi uyashiya ekubeni ilungu lePhalamende likazwelonke le-EFF, uzovusa inhlangano yabo esifundazweni ngonyaka ozayo. “Kusukela ngoJanuwari 2018 ngizobe sengilapho eKZN ngizovusa amaziko e-EFF,” kusho yena.
Uthe usazodonsa izinyanga ezimbili, uNovemba noDisemba, agcine ukuba yilungu kuzwelonke ekuqaleni konyaka ozayo.
Ebuzwa ukuthi uthunywe yi-EFF yini noma kube isifiso sakhe ukuzovusa inhlangano eKZN, uthe uziyekele yena ngoba enothando nesifiso sokuyibona iphila, kwazise ibukeka iyekelelwe kulesi sifundazwe.
“Wonke amavoti abalulekile. Akuwona awabantu baseGoli kuphela abalulekile. Nawabantu be-EFF baKwaZulu-Natal abalulekile,” kusho uMbatha.
Uthe kube wumbono wakhe ukuthi kuzomele kuqiniswe amagatsha enhlangano esifundazweni. “Wonke umuntu we-EFF usijabulele isinqumo engisithathile. Bekuvele kunesikhalo sokuthi iKwaZuluNatal iyekelwe,” kuchaza uMbatha.
Mayelana nokuthi uzoziphilisa kanjani njengoba eseshiye umsebenzi obumholela, uthe akanayo nencane inkinga ngoba unamabhizinisi azoziphilisa ngawo ngenkathi enza lo msebenzi. Uthe yindlela abazokwakha ngayo eyochaza ukuthi bathatha isikhathi esingakanani ukwenza umsebenzi.
Uthe bazoqala ngokwenza izingqungquthela zezifunda, kulandele ezesifundazwe.
“Bese luphumile uhlu lokuthi zizokuba nini lezi zingqungquthela kodwa lwabuye lwahoxiswa uhla lokuqala ngoba kubhekelwa ukuthi mhlawumbe isikhathi sizobe singakavumi, kusamele kuqhutshekwe kwakhiwe,” usho kanje.
Mayelana nezinselelo okulindeleke ukuthi abhekane nazo, uthe akanavalo ngazo ngoba uyazazi izinselelo ezaholela ekuhlakazweni kwamagatsha enhlangano esifundazweni ngo Septhemba 2015.
Mayelana nomuntu ozofakwa esikhaleni sakhe, uthe lokho kuzokwenziwa ngonyaka ozayo ekuqale konyaka.
Okhulumela i-EFF uNksz Naledi Chirwa, uthe ngeke aphawula ngokushiya kukaMbatha ePhalamende.
“Njengoba ngibambe ucingo lukaDkt Mbuyiseni Ndlozi yingoba engekho. Uyoze atholakale ocingweni lwakhe ekupheleni kukaNovemba,” kuchaza uNksz Chirwa.
Akazange athande ukuphawula ngokushiya kwamanye amalungu ale nhlangano ePhalamende, esikhundleni sawo okufungiswe amanye.
UMbatha akayena umafikozolo kwezepolitiki njengoba ngaphambi kokuthi angene kwi-EFF wayekade eyilungu le-ANC.
Wazalelwa eThembalihle, e-Escourt, wafunda ezikoleni zaseMlaza, ngaphambi kokuthi aye ePeninsula Tech.
Uke wasebenza njengomcwaningi, wasebenzela Umsobomvu Youth Funds, waphatha nezinye izikhundla esekwi-ANCYL KwaZulu-Natal. Uthe konke uzobe ekwenza ngezikhwepha zakhe kodwa ufisa abantu bayethembe i-EFF, bakuqonde ukuthi bakhona abayithandayo.