Abaholi abangasekwa abaphonse ithawula: abahlaziyi bezepolitiki
ABAHLAZIYI bezepolitiki bathi abaholi be-ANC abagaqele isikhundla sikamengameli kodwa abangasekwa ngokwanale emagatsheni kumele ngabe sebephonse ithawula ukugwema ukuthi bazithele ngehlazo engqungqutheleni kaDisemba.
Abaholi ababonakala beyizimfivilithi embangweni wesikhundla sikamengameli, iPhini likaMengameli, uMnuz Cyril Ramaphosa, nembangi yakhe enkulu, uDkt Nkosazana Dlamini Zuma.
Ngokwabahlaziyi abaholi oDkt Zweli Mkhize, Nksz Lindiwe Sisulu, Nksz Baleka Mbete noMnuz Mathews Phosa noMnuz Jeff Radebe abagaqele isikhundla kumele ngabe sebehlanze ngedela.
Umkhankaso odonsa kanzima wabaholi abangenakho ukwesekwa okwanele emagatsheni uphinde waphazanyiswa futhi yisimemezelo sikaNobhala-jikelele weqembu uMnuz Gwede Mantashe esithi uphiko lwentsha nombutho wabesifazane kuzothathwa njengezifundazwe njengoba kuyiwa engqungqutheleni.
Umhlaziyi wezepolitiki ozimele KwaZulu-Natal, uMnuz Thabani Khumalo, uthe ukuthathwa njengezifundazwe kwezinhlaka ze-ANC okubalwa kuzo uphiko lwentsha nolwabesifazane kwenza kusinde kwehlela kubaholi abagaqele isikhundla sikamengameli kodwa abadonsa kanzima. “Njengoba laba baholi behluleke emagatsheni lapho bekumele baqokwe khona akusekho lapho bengabambelela khona.”
Uthe vele sebehlazekile nasemagatsheni njengoba bengakhethwanga, sebengaya nje engqungqutheleni ukuthi nabo bake basingenela isikhundla sikamengameli.
Omunye umhlaziyi wezepolitiki, uMnuz Xolani Dube, onguMcwaningi esikhungweni iXubera Institute, uthe yinto endala ukuthi i-ANCYL ne-ANCWL bathathwe njengezifundazwe uma kuyiwa engqungqutheleni.
“Yinto ekumthethosikelo weqembu, yingakho i-ANCYL ne-ANCWL benelungelo lokuvota ezingqungqutheleni futhi yingakho bekwazi ukumemezela ukuthi bafisa ukuholwa ngubani njengoba sebenzile,” kusho uDube.
Uthe omakadebona beqembu bona abathathwa njengezifundazwe.