Kusale umndondo bebhaxwa wumphakathi
ZIHLEZI lubhojozi izingane zabafana eMakhonyeni, eJozini, emuva kokushaywa kuze kusale umndondo kwabesilisa ababili abasolwa ngokweba.
Isolezwe lithole ukuthi ngoLwesine oludlule amalungu omphakathi ashaye abafana abahlala eduze kwesitolo sendawo esigqekeziwe baze bayolala esibhedlela.
Kuthiwa selokhu kwenzeke lesi sigameko, izingane zabafana ziyasaba ukuhamba ebusuku ngenxa yokuthi uma kugqekezwa endaweni kuvele kushaywe izingane ezihlala eduze kwezindawo ezigqekeziwe.
Omunye wabafana abashaywe ngumphakathi ubengakwazi nokuchaza esexhunywe ipayipi.
Isolezwe lithole ukuthi kunekomidi lomphakathi eliqapha ezokuphepha okuyilona elijezisa abantu futhi nenduna yendawo iyazi ngalo.
Abakhulume neSolezwe kodwa bangathanda ukudalulwa besaba ukuthi bazolinyazwa wumphakathi, bathe abafana bashaywa kusuka ngo-7 ekuseni kwaze kwaba ngu11 emini.
Omunye uthe ngokujwayelekile uma umuntu esolwa ngokweba uye abizelwe amaphoyisa noma udaba luyiswe enduneni kodwa muva nje ikomidi elilwa nobugebengu livele lizijezisele abantu.
Isolezwe lithinte induna yendawo ebizwa ngokuthi wuMjeyib Gumede ethe ayikwazi ukukhuluma ngalolu daba ngenxa yokuthi isesemsebenzini.
ULieutenant Colonel Thulani Zwane wamaphoyisa KwaZulu-Natal uthe amaphoyisa aseJozini aphenya icala lokushaya ngenhloso yokulimaza emuva kokuthi owesilisa (29) eshaywe ngabantu abaziwayo.
Ucele umphakathi ukuthi ungazijeziseli abantu obasola ngokona ngoba lokho kuphambene nomthetho futhi abenza lokhu bazothweswa icala.