Usomabhizinisi ukhuthaza ukuzimela entsheni
UKHATHAZEKILE ngentsha eneziqu kodwa engasebenzi owesilisa osenebhizinisi lokuqeqesha nokukhuthaza ukuzimela entsheni.
UMnuz Nqubeko ‘Xavi’ Mchunu (23), oyiBusiness Coach, uthe intsha kumele ifunde ukwenza izinto ezithandayo iziphendule amabhizinisi ukuze ingapheli amandla. UMchunu oneziqu zeBusiness Management Diploma azithola eBerea Technical College, akalindanga ukuqashwa njengoba esengene ebhizinisini.
Ungumnikazi wenkampani esebenza kwi-internet iStreet Wise Trends eveza izinto ezinganakiwe ezenziwa ngabantu emgwaqweni azisabalalise nasezinkundleni zokuxhumana.
“Sinenkinga enkulu yentsha efundile kodwa ehleli emakhaya ngenxa yokushoda kwamathuba omsebenzi. Akumele silinde ukuqashwa kodwa umuntu kumele alandele into ayithandayo ukuze kube lula nokuphumelela ebhizinisini. Ngiqale ngokusebenzisa izinkundla zokuxhumana ukucobelela intsha ngamasu amabhizinisi, okwenze nami ngavulekelwa ngamanye amathuba,” echaza.
Phakathi kwamakhasimende akhe awachushisa kwezamabhizinisi kubalwa uSithembiso Ngcobo owayedlalela iKaizer Chiefs osengene kwezamabhizinisi.
Uphinde athumele izindaba zamabhizinisi e-University of KwaZulu-Natal (UKZN) zishicilelwe ngosolwazi abakulo mkhakha. Emasontweni amabili edlule uhlonishwe yi-UKZN ngesitifiketi kwezamabhizinisi ngenxa yomsebenzi wakhe.
“Angikaze ngibe wumfundi ngokugcwele kule nyuvesi kodwa ngizama ngayo yonke indlela ukuzisondeza ngoba nginogqozi nothando lwento engiyenzayo. Ngifuna ukuba yisibonelo entsheni ukuthi uyakwazi ukuzivulela iminyango nalapho kungalindeke khona. Ngazicelela e-UKZN ukuqeqeshwa kwezamabhizinisi njengoba ngihlonishwe ngesitifiketi emuva kokuqeqeshwa izinyanga eziyisithupha,” kuchaza uMchunu.
Ngaphandle kokuqeqeshelwa ezamabhizinisi kulesi sikhungo, uMchunu ubuye amenywe ukuzokhuthaza abafundi ngezinkulumo ezakhayo, axoxe nangempilo yakhe.
Echaza ngenkampani yakhe iStreetWise Trends, uthe uthatha noma yini eyenziwa emgwaqweni ayibona ingaphendulwa ibhizinisi. Kulokhu kubalwa abadansi basemgwaqweni nabadayisa bezimpahla ezingajwayelekile.
UMchunu ukhulele eShowe kodwa usehlala e-Avoca, eThekwini.
Uphothule umatric eSivananda Technical High, KwaMashu. Usaqhubeka nokuthuthukisa izifundo kwezamabhizinisi eBerea Technical College.