Bagxeka okushiwo yiDA ngamakhosi
UMNYANGO wezokuBusa ngokuBambisana neziNdaba zoMdabu KwaZulu-Natal uyithatha njengokugcwaneka inkulumo eyenziwe ngumholi weDA esiShayamthetho, uMnuz Francois Rodgers, mayelana nobuholi bendabuko nokwesekwa obukunikwa nguhulumeni wesifundazwe.
Inkulumo yeDA imayelana nemizi yezizwe (okuhloswe ngayo ukubuyisa isithunzi samakhosi asendlunkulu).
Ngokusho kukaRodgers imizi yezizwe isetshenziswa ngamakhosi nemindeni yawo hhayi imiphikathi ayiholayo. Kodwa umnyango uyakuphika lokho uthi imizi yezizwe isetshenziswa ngamakhosi nezizwe zawo.
“Wonke amakhosi anemizi yawo, asebenzisa imizi yezizwe uma eqhuba imisebenzi yesizwe. Kuyaziwa futhi ukuthi imiphakathi eminingi eholwa ngamakhosi iyikhaya lamabhizinisi njengoba kwezinye izindawo kukhona izimayini kuqhutshwa nezolimo,” kusho uNgqongqoshe wezokuBusa ngokuBambisana neziNdaba zoMdabu KwaZulu-Natal, uNkk Nomusa Dube-Ncube.
UNkk Dube-Ncube uthe uRodgers ulihlanekezele ngamabomu iqiniso ngoba ehlose ukudukisa abantu.
“Njengomnyango asisithusi isenzo sikaRodgers ngoba siyayazi inzondo i-DA enayo ebhekiswe ezinhlakeni zobukhosi bomdabu. Leli qembu lihlale lihlasela Isilo, amakhosi nezinhlaka zobukhosi,” kusho uNkk Dube-Ncube.
Uthe yonke into eyenziwa wuhulumeni enzela amakhosi i-DA ihlale ithi kumoshwa imali ngayo.
“Ukuba kuya nge-DA amakhosi ngabe athwele kanzima awanikwa sizo njengoba kwakwenzeka ngesikhathi sikahulumeni wobandlululo,” kusho uNkk Dube-Ncube.