Bahlongoza intela ezosiza izitshudeni
INHLANGANO yezepolitiki yezifundiswa i-Academic Congress Union (ACU) iphakamisa ukuthi kube nentela ebizwa nge-Education Tax ezokhokhwa osomabhizisi ngenhloso yokuthi kufezwe iphupho lemfundo yamahhala kuleli.
Ukuphawula kwe-ACU kulandela umnyakazo kaMengameli Jacob Zuma wokukhipha umbiko weKhomishini kaJaji Jonathan Heher ebicubungula ukuthi iNingizimu Afrika ingakwazi yini ukuba nemfundo yamahhala.
Umholi wale nhlangano, uMntwana uMzonjani Zulu, owahlubuka kwiNFP, uthe basishayela ihlombe isiphakamiso sokuthi abafundi basemakolishi aqeqesha ngokwamakhono abafunde mahhala.
“Lokhu kuyakhombisa ukuthi nasemanyuvesi ingenzeka imfundo yamahhala, uhulumeni kuzomele abheke ezikhwameni zakhe abone ukuthi angathatha kuphi ukuze kufezwe iphupho lemfundo yamahhala,” kusho uZulu.
UZulu uthe inhlangano yabo ibilokhu iyingxenye yomzabalazo wabafundi wemfundo yamahhala kuleli.
I-ACU isungulwe ngo-2016, ngaphambi kokhetho lohulumeni bezindawo.
Leli qembu lingenele ukhetho kuyona yonke imikhandlu eKZN, ezingxenyeni ezithile eGauteng nase-Eastern Cape kodwa lakwazi ukuthola izihlalo ezimbili kuphela eMkhandlwini waseMbizana.
UZulu uthe uneme ngendlela iqembu lakhe elikhula ngayo.
Uthe njengamanje sebenamalungu angaphezu kuka-100 000, iningi lawo okungabafundi basezikhungweni zemfundo ephakeme.
Ngempelasonto i-ACU yamukele amalungu amasha abevela emaqenjini ahlukene ezepolitiki okubalwa i-IFP, DA, ANC ne-PAC.
UZulu uthe inhloso yokusungula inhlangano ukuthi bagqugquzele imfundo baphinde balekelele abafundi ekutheni bathole imisebenzi.
Uthe uyathemba ukuthi iqembu labo lizokwenza kangcono kakhulu ngo-2019, ikakhulukazi njengoba lijoyinwa abafundi basezikhungweni zemfundo ephakeme.
“Ngiyafisa ukuthi ngemuva kokhetho luka-2019, i-ACU ibengelinye la maqembu azongena kuhulumeni,” kuphetha uZulu.