Siyabahalalisela abathole imiklomelo kumaSports Awards
UKUKHONYA kwabasubathi kumaSA Sports Awards ngeSonto, kuyizimpawu zokuthi kukhona okuhle okwenzekayo kwezokugijima eNingizimu Afrika.
ULuvo Manyonga ongumpetha womhlaba we-long jump uyena obe nobusuku obuhle ewola imiklomelo ebalulekile eKempton Park, eGoli. UManyonga ukhale wemuka neSportsman of the Year, neSports Star of the Year okuyimiklomelo esuke imikhulu kulo mcimbi.
Ukudlondlobala kukaManyonga kuyinto enhle uma kubhekwa ukuthi uke wamiswa kulo mdlalo ngenxa yezidakamizwa eminyakeni edlule. Ubuye ngamandla wakhombisa umhlaba ukuthi unalo ikhono kwi-long jump ehlula ezinye izinkakha zakwamanye amazwe. KwiSports Star of the Year uManyonga wehlule umpetha womhlaba kwi-800m uWayde van Niekerk noChad le Clos, okungabadlali asebeke bawuwina lo mklomelo phambilini.
Abagijimi baqhubekile nokuzidlela amahlanga kulo mcimbi njengoba uCaster Semenya ongumpetha womhlaba kwi-800m, ebe yiSportswoman of the Year kwathi umqeqeshi wakhe uJean Verster wathola umklomelo womqeqeshi obehlule bonke ngonyaka odlule. Akugcinanga lapho ngoba noSokwakha Zanini, odle umhlanganiso kwi-400 hurdles ekuqaleni konyaka, uqokwe njengeNewcomer of the Year.
Akukho nokuncane ukungabaza ukuthi abagijimi bethu benze kahle kakhulu emiqhudelwani ehlukene kulo nyaka ngakho ukuchonywa uphaphe lwegwalagwala kulo mcimbi yinto ebibafanele.
Likhulu ithemba lokuthi sizokhula isibalo salabo ababuya nezindondo emiqhudelwaneni yomhlaba eminyakeni embalwa ezayo ukuze iNingizimu Afrika iziqhenye ngekhono enalo kwezokusubatha.
Okubalulekile manje ukuthi i-Athletics South Africa (ASA) iqinisekise ukuthi baba khona abanye abagijimi abazolandela ezinyathelweni zalaba abasenza sizishaye izifuba, ngokungakhohlwa ukunaka labo abasemazingeni aphansi abazifelayo ngale midlalo. Kuma-Commonwealth Games ezayo azokuba se-Australia ngonyaka ozayo silindele ukuthi abagijimi bethu benze kahle njengoba kucaca ukuthi baya ngokudlondlobala. Sithi halala kubo bonke abathole imiklomelo eKempton Park, basinikeza ithemba.