Ngithole ukuthi umkami nami sinezibongo ezifanayo
EZOTHANDO
UMBUZO: NGIKHULISWE ugogo ngasohlangothini lukamama. Umama wami wangishiya ngisemncane wayogana kwenye indawo. Seloku ashada angikaze ngihlangane naye nomndeni wakhe. Kumanje ngisebenzisa isibongo sikagogo. Inkinga ngisanda kuthola ukuthi isibongo sikababa wami ongizalayo siyafana nesikankosikazi wami. Ngenzenjani?
Sphamandla, Mvoti Impendulo: Akukho okunye, kumele nihlale phansi njengomndeni niyikhulume le ndaba. Kumele abantu abadala balwazi lolu daba lwesibongo futhi banikeze uvo lwabo. Sazi imindeni eminingi la udaba olukanje lungaphazamisi lutho, umshado ungaphazamiseki ngalutho. Kweminye kwenziwa amasiko afanele ukulungisa indaba yesibongo. Umbuzo: Sineminyaka ewu26 sishadile nomyeni wami. Sashada sisebancane kakhulu. Uqale ukungishintshela eminyakeni emibili edlule. Waqala wathenga imoto entsha yabantu abasha nenesivinini, wahamba indawo yokuzivocavoca, washintsha ngisho indlela yokugqoka. Ngisanda kuthola ukuthi kanti sekukhona umuntu asethandana naye. Uma ngihlala phansi naye sikhuluma ngalolu daba wangitshela ukuthi akasathandi ukushada ngoba akazimisele ukucela kumuntu impilo yakhe yonke. Usenzela nanoma yini esiyidingayo nezingane zethu ezimbili (esezikhulile) kodwa umshado nje angasawufuni. Uthi ufuna ukuphila impilo yakhe ngendlela ayithandayo.
Thula, eThekwini Impendulo: Sifisa sengathi singakhuluma nawe sikweluleke kabanzi. Noma usithinte ukuze sikuthumele iminingwane esabalele ngesimo senkinga yokukhula. Isikhala sincane kakhulu kuleli khasi. Umyeni wakho kubukeka sengathi usesikhathini senkinga yokukhula (midlife crisis). Le inkinga etholwa abantu besilisa nabesifazane cishe phakathi kweminyaka ewu45 ukuya kwewu-60. Inkinga yokukhula isimo la indoda izibona ukuthi isishiywa isikhathi empilweni, amaphupho nezifiso zayo zingakenzeki, noma inkinga ngokozwelo (emotional crisis) edalwa ukubuka ukuthi uyasala empilweni kanti usucabanga nangokufa ngokobudala. Loku kudala izimpawu ezifana nalezi ozidalulayo, okuhlanganisa indoda ezenza umuntu omusha ibe indala. Kuyinto edlulayo. Esingakululeka ngakho ukuthi uma esakhona ekhaya, zama ukungamqulisi. Akukona ukuthi akazi ngobungozi abudalayo ngalezi zenzo zakhe. Khuluma naye sakumkhumbuza ukuthi lokhu akwenzayo kuzodala uqhekeko phakathi kwenu. Zinakekele nawe, ungaziyekeleli. Hamba uyozivocavoca kodwa ube ukwenzela wena, hhayi yena. Hamba uyozithengela izingubo ezintsha ezikufanelayo. Sondela kakhulu kubangane bakho abashadile nabo ukuze uthole izeluleko ezifanele. Ungakhulumi izinkinga zomshado wenu nabantwana benu noma sebekhule kangakanani. Noma kunzima, zama ungamncishi inkonzo yasekamelweni kodwa qiniseka ukuthi uyazivikela ngaso sonke isikhathi. Okokugcina, uma ukholwa, sikululeka ngokuthi khulekela umyeni wakho nomshado wenu ngazozonke izikhathi. Umbuzo 3: Uma usunomuntu othandana naye, yisiphi iskhathi esikahle sokubuza umuntu wakho ngekusasa? Nginezinyanga eziyisithupha ngaphuma ebudlelwaneni beminyaka emine engathola umntwana kubo. Ngiyesaba ukuzithola sengimoshe esinye isikhathi sami nomuntu ozidlalelayo nje, kanti neminyaka seyihambile bakithi. Nginobudlelwane obunenyanga qha buqalile, ngingabuza ngekusasa noma ngime? Isiphi isikhathi sokukhuluma ngekusasa?
Lethiwe, eThekwini Impendulo: Abantu besilisa babuye babe nenkinga yokuzibophezela, ikakhulukazi kulesi sikhathi samanje. Iningi labo liyethuka uma umuntu wesifazane ekhombisa intshisekelo enkulu baze babone sengathi lowesifazane usephelelwe ithemba. Kuhle ukukhuluma ngekusasa, ikakhulukazi uma ubona sengathi ubudlelane benu buyakhula. Kodwa kubalulekile ukuthi ukhuluma nini. Kunzima ukubeka isikhathi okumele ukhulume ngaso kodwa nawe uzokwazi uma uthando lwenu seluqala ukukhula. Kuzozenzekela.
Kwesinye isikhathi ngeke umbuze kodwa uzozibonela wena. Isikhathi sokuthandana ngaphambi komshado isona sikhathi sokubhekana nokuhlolana kahle ukuze nithathe izinqumo ezimqoka ngempilo yenu kwezothando.
Phela nawe njengomuntu wesifazane unezifiso ngempilo yakho, ikakhulukazi uma kukhona nengane. Udinga ukwazi ukuthi likhona yini ikusasa phakathi kwenu. Futhi ungesabi ukuqeda ubudlelwane mawubona ukuthi ikusasa alikho phakathi kwenu. Unalo ilungelo lokwenzenjalo.
Sikufisela inhlanhla sisi. Follow us on: Facebook: Mo & Phindi Instagram: Mo & Phindi Email: info@moandphindi. com