Yinkinga ukugqoma kwezimoto zomalume
Into engiyithandile kule albhamu wumyalezo nje, ikakhulukazi kuyo le ethi Isiqalekiso nale ethi Ngakubongela mama owazalayo mina ngazalela ubala..nale ethi ...okwabonwa umama wam omunye uyokubona.. uthi kules’thembu sikababa nguye umthakathi ..bathi nguye uMaMgo, namanye amanoni amnandi engingeke ngiwabale wonke asibusisayo.
Into egqamile kule ngoma ethi Isiqalekiso abaningi babecabanga ukuthi kukhona umculi amngcofayo kanti cha yingoma nje enomyalezo omuhle.
Ezingomeni zonke ayikho neyodwa angcofa kuyo omunye umculi, phela iningi labathandi bomculo kamaskandi basuke befuna ukuzwa ukuthi ubani utheni kubani ngoba uma zingekho lezo zingoma ezinjalo bathi leyo albhamu ayifikanga ezingeni ngoba kubo kumnandi ukungcofana.
USomnandi ukhombise ukukhula kule albhamu, sithi phambili ngomculo wakho Somnandi osibusisayo. Nandosi Sangweni INXUSA LIKASOMNANDI MHLELI: Ngithatha leli thuba ngithi angiphawule ngento esijwayelekile emphakathini, ubungozi bayo bunganakwa,ibe izovela imiphumela yayo lapho iyocaca khona kuyoba buhlungu.
Kunale nto yamatekisi namaveni ’agibelisa izingane zethu, hheyi bakwethu, ayive inomsindo imisakazo akhona! Kuyifeshini ukuthi kufanele agqome, adumele phezulu, izingane zigcwale zichichime.
Ngokocwaningo, lo msindo ongaka uyayibulala imizwa yokuzwa. Ukufa kwale mizwa kufa kancane kancane akusheshi ukucaca kodwa lapho inkinga yokuzwa ngezindlebe isivela kusuke sekungekho okungenziwa. Lapho isimo sisuke sesingeke sisabuyiselwa emuva. Lezi zingane ziyothi zifika emazingeni aphezulu emfundo lapho kusuke sekushube kakhulu, sezifundela iziqu zazo ziyobe zingasezwa ezindlebeni.
Kubuhlungu kimina ukubuka isimo sokuzwa sezingane zethu sishabalaliswa kancane kancane abantu abanye babo abangazange bafike kula mazinga engikhuluma ngawo noma abangayikhathalele impilo yokuzwa kwezingane zethu kubanikazi nabashayeli balezi zithuthi. Kulaba bantu uma kungena imali kuphelile , ilokho okusemqoka kubona.
Ngiphakamisa ukuthi uhulumeni abeke imigomo ezolawula umsindo kulezi zimoto ezithatha izingane futhi bajeziswe abawuphulayo ngoba ikusasa lezingane zethu leli elimoshekayo. Imithetho ikhona ezweni lethu.