Ufundisa umphakathi ukuthanda ukuvakasha ezindaweni zawo
UKUFUNDISA umphakathi ngokubaluleka kokuvakashela izindawo zawo kuwukhiye wokujwayeza abantu ukuthi bavakashe.
UNksz Maseru Madlala (34) wenkampani ehlelela abantu izindawo abangazivakashela, i-Azibuye Emasisweni Tourism, usho kanje.
UNksz Madlala waseMzinto unohlelo lweminyaka emihlanu lokuvakashisa abafundi bamabanga aphansi ezikhungweni zokuvakasha zaseThekwini.
Uhlelo lwaziwa ngokuthi iKnow Your City, luyingxenye yolokukhuthaza abafundi abasebancane ukuthi bazijwayeze ukuvakasha oluxhaswe uMnyango wezokuVakasha kuleli, olwenziwa kuzo zonke izifundazwe kuleli.
Ubambisene nomkhandlu weTheku okuyiwo oqoka izikole emiphakathini entulayo. Kulo nyaka zintathu izikole azivakashisile ngalolu hlelo.
UNksz Madlala uthe bakhethe ukuthi bavakashise mahhala abafundi abasuka emiphakathini entulayo ngenxa yokuthi iningi labo lazi ukuthi uma livakashile kumele liye olwandle.
“Othisha bayazazi izindawo zokuvakasha kodwa kuba nzima ukuthi abazali bakhokhe imali yokungena kulezo zindawo, kugcine kuyiwe olwandle kuphela,” kusho uNksz Madlala.
Ngalolu hlelo uthe bavakashela eShaka Marine World, eMichell Park, Moses Mabhida, iNanda Heritage Site nezinye.
Uthe inkampani yakhe inohlelo lokuvakashisa ogogo nentsha.
“Ngesikhathi ngiluqala lolu hlelo ngo-2013 abazange bakhokhe. Iningi labo selike laphinde lavakashela kulezi zindawo selizihambela lodwa. Ezokuvakasha zifaka umnotho kodwa kumele uqale ngokufundisa umphakathi ngokubaluleka kokuvakasha.
UNksz Madlala uneBTech yeTravel and Tourism ayifunde eManchester University of Business School. Lezi zifundo uthe wazenza evakashele e-UK. Uhlale iminyaka eyisikhombisa khona.
“Ngaphambi kokuya eManchester ngangingenandaba nokuvakasha. Ngesikhathi ngikuleliya lizwe ngifunde okuningi, kulapho ngifunde khona ukuthi mningi umnotho ongeniswa ezokuvakasha,” kusho uNksz Madlala.
Ekubuyeni kwakhe kuleli uthe uqaphele ukuthi umkhakha wezokuvakasha usenabantu abamhlophe abaningi.
Uthe inkampani yakhe wayisungulela ukuthi ashintshe indlela lo mkhakha oyiyona.