Amaphoyisa azoqhubeka nokuqapha isimo eGlebelands
AZOKANISA yonke indawo amaphoyisa ehostela lezidube iGlebelands eseMlaza, eThekwini, njengoba ikomiti lezokuphepha ePhalamende lithe lizoqinisekisa ukuphepha kwabahlala kuleli hostela.
USihlalo wekomiti lezokuphepha, uMnuz Francois Beukman, uthe bazoqhubeka nokutshala amaphoyisa ngoba bakhathazekile ngokubulawa kwabantu ehostela laseGlebelands.
Uveze ukuthi zingu-76 izigameko zokubulawa kwabantu eGlebelands, ezingu-56 zenzeke ngaphakathi ehostela kuthi ezingu-14 zenzeka ngaphandle kwalo.
Bangu-26 abantu asebeboshiwe ngezigameko zokubulawa kwabaseGlebelands kodwa babili kuphela abashushisiwe batholwa benamacala.
“Kufanele kuqiniswe ezokuphepha nobunhloli ukuze kuboshwe ababulali.
“Sifuna amaphoyisa nazo zonke izinhlaka ezibhekelele ubugebengu ziqhubeke nokusebenza.
“Kutshalwe amaphoyisa amaningi,” kusho uBeukman.
Uphinde waveza ukuthi bakhathazekile ngokubulawa kwabantu okusanda kwenzeka yize kungenelele iminyango ehlukahlukene.
Uphinde waveza ukuthi bayakwamukela ukuqashwa kabusha kwabaseshi abayisikhombisa abaqale ukusebenza ngoNovemba 1.
Uthe badinga ukuthi kuqashwe amanye amaphoyisa ikakhulukazi KwaZulu-Natal naseKapa.
Mayelana nokwebiwa kwezibhamu eziteshini zamaphoyisa zaseWestern Cape okuyi-Mitchell’s Plain neBellville South ikomiti lithe liyajabula ngokutholakala kwezibhamu ezintathu ebezebiwe kulezi ziteshi.
Mayelana nodaba lwabavukuzi abangekho emthethweni ikomiti likujabulele ukusebenzisana kukahulumeni nezinkampani ezizimele ukuqeda lo mkhuba.
UBeukman uthe bazoqhubeka nokubheka ukuthi iziphakamiso zabo abazenze ngesikhathi bevakashele KwaZulu-Natal nakwezinye izindawo ziyalandelwa yini ukuze kuqedwe ubugebengu. Uthe bazoxoxisana nophiko lwezobuNhloli noKlebe ngezinhlelo zokuqeda ukuvukuza okungekho semthethweni nokushushumbiswa kwemali.
Khonamanjalo amaphoyisa abophe indoda (61) etholwe nesibhamu esingekho emthethweni nezinhlamvu, eGlebelands ngoMsombuluko ntambama.
Le ndoda ivele enkantolo yaseMlaza ngoLwesibili kanti uKhomishana wamaPhoyisa KwaZulu-Natal uMajor General Bheki Langa utuse kakhulu amaphoyisa ngokuboshwa kwale ndoda.
Esitatimendeni uMajor General Langa uthe amaphoyisa ebesesha izimoto ezingena kuleli hostela iGlebelands ngesikhathi ebona iToyota esolisayo ingena.
Avimbe umnikazi wayo amthola nesibhamu i-9mm nezinhlamvu ezingaphezu kuka-15 ambopha.
“Sizokwenza konke okusemandleni ukuqinisekisa ukuthi kunokuthula nozinzo eGlebelands futhi labo abathinteka ezigamekweni zobugebengu sizobavalela ejele.
Isibhamu esitholwe kumsolwa sizohlolwa ukuze kubhekwe ukuthi asithinteki yini kwamanye amacala okubulala enzeka eGlebelands nasezweni jikelele,” kusho uLanga.