Ziphinde zakhwela kuNxedlana waseFNB
USEYISIKHULU esiphezulu esibhekelele umcebo nokutshalwa kwemali kwa-FNB uMnuz Sizwe Nxedlana obeyiChief Economist kuleli bhange.
UNxedlana usesebenze kwa-FNB iminyaka eyisishiyagalolunye kanti ubeyisazi somnotho esihamba phambili nomhlaziyi wawo kusukela ngo-2012.
Esitatimendeni, isikhulu esiphezulu sakwaFNB uMnuz Jacques Celliers sithe amakhasimende abo alondoloza imali yawo ezimakethe zomhlaba azohlomula ngesipiliyoni sikaNxedlala kwazise uyazi ukuthi iziphi izimakethe eziletha umcebo.
UNksz Mamello Matikinca obengumhlaziyi womnotho iSenior Macro Economic Analyst usezoba yiChief Economist.
UCelliers uthe bakhethe ukuza nezinguquko ebuholini babo ukuze amakhasimende athole imikhiqizo ehlukene kubasebenzi abanolwazi olunzulu.
Uthe bazoqhubeka nokuqinisa emikhiqizweni yobuchwepheshe besimanje kwazise amakhasimende azokwazi ukuthola izidingo zawo kumaselula nakumakhompyutha.
Uveze ukuthi amakhasimende abo angaphezu kuka-2.2 million aselondoloza imali ngokusebenzisa i-internet.
“Bangaphezu kuka-7.8 million abantu abathenga imikhiqizo yethu. Senza konke okusemandleni ukuqinisekisa ukuthi amakhasimende ethu athola imikhiqizo yethu kumaselula nakumakhompyutha. Izazi kwezokutshalwa kwemali ezingaphezu kuka-800 zizobe zikhona ukululeka amakhasimende ethu,” kusho uCelliers.
Uphethe ngokuthi bazoqhubeka nokuza nemikhiqizo ezothuthukisa abantu baseNingizimu Afrika okubalwa umshwalense wempilo, ukutshalwa kwemali kwamanye amazwe nokunye.