SekuseMome kusungulwe ibhange labamnyama
SELIDUMELA emasumpeni ngokusungulwa kwebhange labamnyama elingumfelandawonye elizobizwa ngeKhanya Co-operative Bank.
Leli bhange kulindeleke ukuthi lilethe uguquko emkhakheni wamabhange.
UMnuz Sibonelo Radebe owuqweqwe lwentatheli yezomnotho futhi osekomitini laleli bhange, uthe basezinhlelweni zokuthula ilayisensi yokuvula ibhange.
Uthe ilayisensi yebhange elingumfelandawonye idinga amalungu angu-200 abe no-R100 000 esikhwameni sawo.
Uveze ukuthi bashoda ngamalungu angu-50 futhi ukuba yilungu laleli bhange kuzodinga ukuthi umuntu akhokhe u-R2 500.
Ilayisensi yebhange iyona ezobavumela ukuthi bakwazi ukulondoloza imali nokubolekisa ngayo emalungwini abo.
Uthe ilayisensi yebhange elikhulu ibiza u-R250 million kuthi eyebhange elingumfelandawonye ibize u-R20 million. “Uhlelo lwethu lukhombisa ukuthi eminyakeni emithathu sizobe sesithole amadephozithi angaphezu kuka-R20 million. Lokhu kuzokwenza sikwazi ukuthola ilayisensi yokuba yibhange elingumfelandawonye,” kusho uRadebe egcizelela ukuthi abasunguli ibhange elifana najwayelekile.
“Sizosungula ibhange elisebenzela umphakathi. Elizophathwa ngabantu bomphakathi lakhele abantu bakithi umcebo.”Uthe bazokwazi ukukhulisa ibhange labo licebe eminyakeni engu10 ezayo.
IKhanya Co-operative Bank izoba yingxenye yamabhange amancane azoshukumisa umkhakha wamabhange olawulwa yizikhondlakhondla ezingo-Standard Bank, First Rand, Nedbank, Absa noCapitec.
Ngenyanga edlule iDiscovery ithole ilayisensi yokusungula ibhange layo kwiRegistrar of Banks. NgoSepthemba iTyme Digital engaphansi kweCommonwealth Bank iveze ukuthi ithole ilayisensi yokusebenza eNingizimu Afrika kwibhange lombuso iSouth African Reserve Bank (SARB). Yilayisensi yokuqala enikezwe ibhange elisha yiSARB kwazise kwakugcine ukwenzeka lokhu ngo-1999.
NgoJulayi wonyaka odlule SARB inikeze abaseposini ilayisensi yokuthi bavule ibhange labo.
URadebe uthe umkhakha wamabhange uzoshintsha ngoba o-Absa noStandard Bank sebebe kulo mkhakha iminyaka engu-100.
Uthe abantu abamnyama kufanele baqale izikhungo zabo ezizobasiza ukwakha umcebo ebalula nokuthi kunesiko lokulondoloza imali istokfela elinomcebo omningi.
Izazi zithi zingaphezu kuka-820 000 izitokfela eNingizimu Afrika kanti zinamalungu angaphezu kuka-11.4 million alondoloza u-R44 billion ngonyaka.
URadebe ugxeke osopolitiki abafuna amabhange afakwe ngaphansi kukahulumeni ngaphandle kokukhokhela abanikazi bawo esho ukuthi badlala ipolitiki.
Usho lokhu emuva kokuchithwa kwesiphakamiso somholi we-EFF uMnuz Julius Malema sokuthi amabhange afakwe ngaphansi kukahulumeni ngaphandle kokukhokhelwa kwabanikazi bawo.
Amalungu ePhalamende asichithile lesi sicelo ngesonto eledlule esho nokuthi asikho semthethweni futhi sikhombisa ukuthi osicabangile akalicabangeli izwe.