IDunlop neThala basiza abamagaraji
IBHANGE iThala nenkampani ekhiqiza amasondo iDunlop, sebesungule uhlelo lokuxhasa osomabhizinisi basemalokishini nasezindaweni zasemakhaya. Lezi zinkampani zethule lolu hlelo ngoLwesibili emahhovisi eThala eWaterfront, eThekwini.
Obhekelela ezokukhangisa eThala, uNksz Thuli Gelelekile, uthe uhlelo luzothuthukisa amabhizinisi, amagaraji amathayi akwaDunlop azinze emalokishini nasezindaweni zasemakhaya.
“Sijwayele ukusebenzisana nabantu asebewaqalile amabhizinisi amathayi nokulungisa izimoto, ngokubanikeza ikhonteyina yakwaDunlop ephuzi ngokombala. Siphinde sibanikeze nezinsiza kusebenza ngalolu hlelo,” kusho uNksz Gelelekile.
Uthe konke lokhu kubiza imali ebalelwa ku-R50 000 kanti abasuke bexhasiwe banikezwa isikhathi esingangenyanga noma izinyanga ezimbili ukuthi bawukhokhe.
Omunye wosomabhizinisi asebeke bahlomula ngalolu hlelo, uMnuz Sandile Sithole, waseEstcourt uthe ibhizinisi lakhe waliqala ngonyaka odlule.
“Ngabhalisa ngaphansi kwalolu hlelo kwiThala ngesikhathi ngidinga imali yokulenza lisimame. Ngafika ngaziswa ngohlelo abalenza neDunlop, ngaluthanda, bangisiza bangiboleka u-R50 000 owangilekelela kakhulu. Njengamanje ibhizinisi lihamba kahle,” kusho uSithole.
Selokhu lisunguliwe lolu hlelo sekuhlomule osomabhizinisi abahlanu kanti leli bhange lithe linamakhonteyina angu-100 elilindele ukuxhasa ngawo abantu.
Okhulumela abakwaDunlop, uMnuz Henal Konjela, uthe kuyamjabulisa ukuthi umsebenzi wabo uguqula impilo yabantu.
UKonjela uphinde asebenzisane nabantu abasaqala ukwenza lolu hlobo lwebhizinisi abadinga ukucathuliswa kanti uphinde ahambele namakolishi amakhono amaTVET emphakathini.
Owakwa Sumitomo Rubber SA, uNksz Yvette Govender, uthe ujabule kakhulu ngalolu hlelo.
“Ziningi izingozi esibhekana nazo ikakhulukazi njengoba sesibheke emaholidini ezizogwemeka ngokuthi izimoto zilungiswe emagaraji aseduzane nemiphakathi. Sesilungise amakhonteyina awu100 azofika noma inini eNingizimu Afrika,’’ kusho uNksz Govender.