Azihlangani izinto kowe-Bucs
KUMELE abhukule umgadli we-Orlando Pirates, uThabiso Kutumela, ukuze akwazi ukuba bukhali phambi kwamapali.
Lo mgadli akakayitholi ifomu yakhe eqenjini elikhulu elinenkinga yokushaywa kwamagoli.
Lobu buthuntu babagadli bePirates, okubalwa kubona noThamsanqa Gabuza, sebuholele ekutheni iphume kwiTelkom Knockout. Nakwiligi isiqhube imidlalo emihlanu inganqobi. Kule midlalo ishaye amagoli amane kuphela.
Emidlalweni eminingi iBucs ibinqoba ngegoli elilodwa.
Ngempelasonto edlule uKutumela unikezwe ithuba lokuvusa ifomu eqenjini leMultichoice Diski Challenge (MDC). Nakhona uhlulekile ukuhola amaBhakabhaka amancane phambi kwamapali njengoba begcine babambene ngo 1-1 neKaizer Chiefs.
UKutumela obedlala njengomgadli wesibili kuleli qembu esizana noFredie Hlalele abebebuye baphambane naye ngokufunda umdlalo, emathubeni awatholile elinye ulibhamuze phezu kwamapali.
Umqeqeshi weqembu leMDC, uReyaan Jacobs, uthe lo mgadli ubemlande ngokumethemba kwazise uke wabasiza kweminye imidlalo.
“Besimlethile lapha ukuthi azothola ukudlala njengoba kunekhefu. Sike samsebenzisa phambili wasisiza sawina. Leli thuba alitholile bekumele alivalele phakathi esebhekene nonozinti. Kumele abe bukhali phambi kwamapali naye uyazi ukuthi yilokho okumele asebenze kukhona,” kusho uJacobs.
UKutumela ufike kwiPirates ekuqaleni kwesizini edlule ngemuva kokuqhulula amagoli kwiBaroka FC isayibamba kwiNational First Division (NFD).
Nokho ukuthola kunzima ukuveza lobu bukhali selokhu efikile esigabeni esikhulu.
Akasiyena umdlali wokuqala ukusuka kwiNFD eyisibabuli esingalibheki ipali kodwa kwiPremiership athwale kanzima.
Lokhu kwenzekile kuNkosinathi Mthiyane abanaye kwiPirates kodwa naye ongasalitholi ijezi.
UPhumelele Bhengu uselunguze kaningi esigabeni esiphezulu kodwa afike ahluleke. Kamuva uSedwyn George oshaye amagoli amaningi kwiNFD ngesizini edlule, akawutholi umgqigqo wamagoli kwi-Ajax Cape Town njengoba manje sekukhulunywa eyokuthi angase abolekiswe eqenjini abelidlalela ngesizini edlule iRoyal Eagles.