Ugaqele ukuhamba kwezomnewabo ngeTKO
UGAQELE isicoco seTelkom Knockout umdlali wePolokwane City, uWalter Musona, ofuna ukulandela ezinyathelweni zomnewabo uKnowlegde Musona owakhala wemuka nalesi sicoco esaziwa ngeZiwa Mo amahlandla amabili.
UWalter (21) ufuna ukuqopha umlando ngokuphakamisa iTKO. UKnowledge wayeseqenjini laMakhosi elahlabana ngeTelkom Knockout ngo-2009 nango-2010.
I-Polokwane City izoshukana neBloemfontein Celtic e-Old Peter Mokaba Stadium, ePolokwane, eLimpopo, ngeSonto ngo-3.30 ntambama emdlalweni we-semi final yeTKO. Ozonqoba uzobhekana neBidvest Wits noma iKaizer Chiefs abazotholana phezulu eBidvest Stadium, eGoli, ngoMgqibelo ngo-3.30 ntambama.
UMusona utshele Isolezwe ukuthi ayikho enye into abayibhekile ngaphandle kokufinyelela kowamanqamu.
“Ngesikhathi uKnowledge enqoba isicoco seTelkom Knockout kabili neChiefs ngangisadlala eZimbabwe kodwa ngiyikhumbula kahle imidlalo yamanqamu. Ngangeseka iChiefs ngoba uKnowledge wayedlala kuyona. Ngenhlanhla wayinqoba iminyaka ilandelana. Nami-ke ngifuna ukuyinqoba ukuze ngizomkhombisa uma sengiyiwinile ukuthi nayi le ndondo engangikweseka uyinqoba nami senginayo,” kusho uMusona.
Iqembu lakhe selizakhele igama ngokubhuquzisa amaqembu amakhulu. Lishaye iMamelodi Sundowns ngo 2-1 emdlalweni we-Absa Premiership kwathi kusenjalo labambana ngo 0-0 neKaizer Chiefs laphinde ladlala ngokulingana ngo 2-2 ne-Orlando Pirates. NakwiTKO iBucs bayibambe ngo 2-2 ngaphambi kokuyishaya ngo 4-2 kumaphenathi.
“Wonke umuntu uzimisele ejimini. Sihlose ukufinyelela kowamanqamu. Sizokwenza okumele sikwenze ukuze singene kowamanqamu. Sizozinikela ngokuphindiwe ikakhulukazi njengoba sidlalela ekhaya. Umqeqeshi (uBernard Molekwa), ukaputeni (uJabulani Maluleka) nabaseqenjini bayasikhuthaza. ICeltic ngeke siyithathe kancane. Alikho iqembu elilula,” kusho uMusona.
IZimbabwe isibusise iNingizimu Afrika ngenqwaba yabadlali abanonhlonze okubalwa kubona uKnowledge, Gilbert Mushangazhike, Peter Ndlovu, Benjani Mwaruwari noWilfred Mugeyi.
“Uma ngiqhubeka nokusebenza kanzima ngingafika ezingeni labo. Into engiyidingayo nje wukuqhubeka nokuzithoba ngiphinde ngisebenzise ithuba engilitholayo. Uma ngenze njalo nakanjani ngizofinyelela ezingeni labo,” kuphetha uMusona.