Uzosheba ezokuqeqesha nezobunesi
ngonyaka ozayo. Ngikhulumile nabase-DUT ngokuthi ngingayenzi ngokugcwele. Kodwa okwamanje ibhola lihamba phambili enhliziyweni yami. Uma kungahambi kahle mhlawumbe ngiyogcina sengiphelele kwezobuhlengikazi. Kodwa ngethemba ukuthi konke kuzohamba kahle,” kusho uDlamini.
Ubonge abaphathi baMaZulu ngethuba lokuqeqesha.
“Kusuka kudala bengizitshelile ukuthi uma ngiyeka ibhola ngifuna ukuqeqesha. Ekupheleni kwesizini edlule nginqume ukuyeka. AmaZulu abe yiqembu lokuqala engilithintile ngesifiso sami base bethi ngingeza sizoxoxa. Okwamanje ayikho inkontileka enginayo kodwa sivumelene ngokuthi sizobuyekeza ekupheleni kwesizini ukuthi kusebenzeke kanjani,” kusho yena.
UDlamini usebenzisana noRonnie Moroka onomlando omude ekusebenzeni nabadlali abasebancane ebholeni njengoba eke wayibamba enkulisa yeJomo Cosmos.
Uke waqeqesha nakwiNational First Division kwiThanda Royal Zulu.
Bahlalelwe ukuqinisa iqembu laMaZulu FC eliyibamba kwiMultichoice Diski Challenge (MDC).
Usuthu alukanqobi kule ligi emidlalweni eyisikhombisa. Ngempelasonto edlule AmaZulu athole isibhaxu sika 5-0 kubakhaya iLamontville Golden Arrows.
“Ngiyazi njengomqeqeshi wahlulelwa ngemiphumela kodwa abadlali baya ngokukhula. Iningi labo liqhamuka ezindaweni ezingaphandle kweTheku lokho kuthatha isikhathi ukuthi ukujwayele. Umbandela wethu akuwona ukuwina iligi kodwa ukwakha iqembu,” kusho uMoroka.