‘Owamanqamu oweTKO neWits’
ISITOBHA seKaizer Chiefs, uPhilani Zulu, asenelisekile ngezinga laso kusukela sinikwe ithuba lokuzibonakalisa kumqeqeshi weqembu uSteve Komphela.
UZulu ujoyine iChiefs ekuqaleni kwesizini ka-2017/2018 esuka kwiMaritzburg United. Iphele isizini ka-2016/2017 esedingisiwe emuva kokwenqaba ukusayina inkontilela entsha.
Nokho kuMakhosi ufike wathwala kanzima ukuthola isikimu emuva kwesokunxele, okuyindawo obekukhonya kuyona uTsepo Masilela noSibusiso Khumalo. UZulu unikwe ithuba emuva kokulimala kwalezi zitobha ezinyangeni ezedlule.
Nakuba abalandeli sebekhombisa ukuyithakasela indlela adlala ngayo kodwa yena usabona kukhona lapho okufanele aqinise khona. Eminyakeni edlule, esekwiMaritzburg, uZulu ubeyibamba esiswini nasohlangothini lwakwesokunxele.
Ushintshwe nguKomphela esapheka iTeam of Choice, wamenza umdlali wasemuva, echazwa yindlela azikhandla ngayo.
“Bekunzima ukungadlali. Uma ubukade ungadlali isikhathi eside kuba nzima. Kuyakwehlisa lokho. Kudingeka udlale ukuze uzoba sezingeni elilodwa nabanye abadlali.
Bekunzima kimina. Kudingeke ngisebenze ngokuphindiwe. Kodwa uthando lwebhola nezifiso enginazo ngebhola yikhona obekungigqugquzela,” kusho uZulu.
“Bengingazi ukuthi ngiyakwazi ukudlala emuva kwaze kwaba uKomphela ungidlalisa khona. Manje sekuyiyona indawo engikujabulelayo ukuyidlala ngoba bengingazi ukuthi ngingayidlala. Osekumele ngisebenze kukona manje wukuthi ngenze umsebenzi womdlali wasemuva, ngisize uma sihlasela. Uma ngingakwazi ukukuhlanganisa kokubili izinto zingaba lula kimina.”
Emasontweni edlule uKomphela ebuzwa ngomehluko phakathi kukaZulu noMasilela uthe: “Uma uZulu ungamnika ubuchule bukaMasilela, uthathe umdlandla kaZulu uwunike uMasilela konke kungahlangana. Ngebhadi ngeke ukwenze lokho ngoba uMasisela usemdala.” UZulu ungomunye wabadlali okulindeleke ukuthi bathwalise kanzima iBidvest Wits emdlalweni owandulela owamanqamu weTelkom Knockout eBidvest Stadium ngeSonto ngo-3.30 ntambama. Ungomunye wabadlali abangakaze bayiwine indebe kusukela beqalile ukudlala ibhola kwi-Absa Premiership. Lapha kubalwa noKomphela osafuna ukuwina indebe yakhe yokuqala kwiChiefs kusukela afika ngamasizini amathathu adlule.
UZulu uphumele obala ngokuthi iqembu elizowina phakathi kwabo neWits yilona elisethubeni lokudla iTelkom. Komunye umdlalo, iPolokwane City izokwamukela iBloemfontein Celtic ePeter Mokaba Stadium, eLimpopo, ngeSonto ngo-3 ntambama.
“Kubalulekile ukuthi iChiefs iwine iTelkom. Sekuphele amasizini amathathu uma ngibala nalena esikuyona. Kufanele sigxilise imiqondo yethu kulo mdlalo, sisebenze kanzima. Kunzima ukudlala neWits enkundleni yayo kodwa siyiChiefs sithatha zonke izinkundla njengekhaya ngoba sithola konke ukwesekwa esikudingayo. Kusezandleni zethu ukulwa noma ngabe sidlala kuphi, kube sengathi sidlala ekhaya,” kusho uZulu.
“Uma ubheka amanye amaqembu (iCeltic nePolokwane) akuwona ongabhekana nawo uzitshela ukuthi uzodlula. Kodwa umdlalo weWits yiwona owamanqamu ngaphambi kowanqamu. Ngokwami iqembu elizowina linethuba elikhulu lokudla umhlanganiso.”