Ukhuza ibuya ekulingiseni uPam
IKHUZA ibuya ekulingiseni intokazi ebisithathe ikhefu iminyaka emihlanu kulo mkhaka uPam Andrews.
UPam owaqala ukuzakhela udumo elingisa emdlalweni iBackstage nasohlelweni olubizwa ngeCoca Cola Popstars ngo-2001 uzobuyela emdlalweni iRhythm City, aphuma kuyo elingisa indawo kaGail October.
Kulo mdlalo okhonjiswa ngoMsombukulo kuya kuLwesihlanu ngo-7.00, ebusuku uzoqala ukubonakala kuwo ngoNovemba 23.
Ekhuluma ngokubuyela kwakhe kwiRhythm City uPam uthe, ubesekulinde ngabomvu ukuqala ukulingisa futhi njengoba ubesematasa ngezinye izinto ezithinta impilo yakhe. “Ngesikhathi ngithatha ikhefu ekulingiseni ngazitshela ukuthi uma sengibuya futhi awukho umdlalo engizobonakala kuwo ngaphandle kweRhythm City,” kuchaza uPam. Uthe umlingisi uGail uzobuya esengumuntu onesibindi ongavumeli noma yini edicilela phansi isithunzi sakhe.
“Kulo mdlalo uGail ubuya ngenjongo yokuthi uzoqala impilo entsha yize abantu sebemazi ngenye indlela njengoba aphuma isimo sishubile phakathi kwakhe noDavid, konke abantu ababemazi ngakho usekuyekile. Kodwa futhi ufuna ukwakha ubudlelwane obuqinile noDavid ukuze amthembe futhi,” kuchaza uPam.
“Usanguye owesifazane osebenza kanzima futhi ophokophele empumelelweni kodwa usenakho ukubukela abantu phansi futhi uyatshelana amaqiniso yize enenhliziyo enhle,” kuchaza uPam.
UPam ngemuva kokushiya lo mdlalo uke wayohlala phesheya kwezilwandle kungacaci ukuthi wenzani khona.