Abenelisekile ngesigwebo sowabulala onelimhlophe
AWANELISEKILE ngesigwebo umndeni wowesifazane onebala elimhlophe waseMpangeni, owabulawa owabe eyisoka lakhe ngoMeyi, ogwetshwe iminyaka engu-18.
Umndeni kaNksz Asanda Mbuyazi (19) uthi ubufuna agwetshwe udilikajele uSiyabonga Zungu (30), onengane enezinyanga eziyisishiyagalolunye nomufi.
INkantolo yeMantshi eNgwelezane igwebe ngaleli sonto uZungu ngokubulala uNksz Mbuyazi, isidumbu sakhe esatholakala sinamanxeba amaningi okugwazwa, sesonakele. Uninakhulu kamufi uNkk Lindiwe Mashinini, uthe bebelindele isigwebo esingaphezulu ngenxa yesihluku esakhonjiswa uZungu.
“Kunzima ukukhohlwa nokumxolela ngalesi senzo. Asifuni nokukhuluma naye ngoba konke besikuzwa ngenkantolo. Indlela esasonakele ngayo isidumbu sika-Asanda, asikwazanga nokusibona ukuthi asicwiywanga yini,” echaza.
Uthe umufi wayesenezinyanga ezimbili ehlukene noyise wengane, yingakho bengazi ukuthi waye sembulalelani. Kuthiwa wayevele enokuhlukumeza umufi njengoba eke waphahlaza nomakhalekhukhwini wakhe bexabana. Kuvele nokuthi wayengayondli ingane kaNksz Mbuyazi, ongasenabo abazali. Umndeni kamufi wavula icala lokunyamalala kwakhe ngoMeyi 24 emuva kokuba uZungu ethumele ingane ukuthi iyombiza ekhaya. Isidumbu sakhe satholakala ngoMeyi 29 ehlathini eliseduze kwakubo. UZungu waboshwa ngoMeyi 30 esekubhaceni eNgwavuma, wavuma ukuthi wambulala eyedwa umsolwa. UNkk Mashinini uthe abakaze babonane ngisho nomndeni kaZungu obungekho enkantolo. Kuthiwa umndeni wakhe wathutha kwaMbonambi emuva kokuboshwa kukaZungu. Kuleli cala kuvele nobufakazi benyanga ethe yashayelwa ucingo umndeni kaZungu ukuthi azogezwa isinyama emuva kokubulala. Kusolwa nokuthi umufi wadlwengulwa njengoba isidumbu sakhe satholakala sinqunu ehlathini.